Father Kills Daughter for Political Power : सरपंच पदासाठी क्रूर बापानं केली जन्मदात्या लेकीची हत्या !

Nanded Crime दिवसेंदिवस राजकारण किती गढूळ होत आहे याचा प्रत्यय पावला पावलांवर येत असताना पुन्हा एकदा हृदयद्रावक घटना घडली आहे. महाराष्ट्राच्या नांदेड जिल्ह्यात सरपंच पदासाठी निवडणुकीत अडथळा निर्माण होऊ नये म्हणून एका क्रूर पित्यानं आपल्याचं पोटच्या मुलीला संपवलं आहे. या बातमीने पुन्हा एकदा महाराष्ट्रातील राजकारणाची घसरलेली पातळी चव्हाट्यावर येत चर्चेचा विषय झाली आहे. निवडणुका इतक्या महत्त्वाच्या झाल्या आहेत की, जन्मदात्या बापाला सत्तेच्या खुर्चीवर बसण्यासाठी आपल्या लेकीचा जीव घ्यावा लागला आहे.

काय आहे संपूर्ण प्रकरण ?

नांदेडमध्ये पांडुरंग कोंडामंगले याने आपल्या सात वर्षाच्या मुलीला तेलगंणा राज्यात नेऊन (कालवा) केनॉलमध्ये फेकून देऊन तिची हत्या केल्याची धक्कादायक घटना उघडकीस आली आहे. या प्रकरणी तेलंगणा राज्यातील पोलिसांनी मुखेड तालुक्यातील रहिवासी असलेल्या आरोपी पित्याला ताब्यात घेतले आहे. प्राथमिक माहितीनुसार आरोपीला तीन अपत्य आहेत आणि आगामी ग्रामपंचायत निवडणुकीसाठी त्याने सरपंच पदाची तयारी सुरु केली होती. निवडणुकीत तिसरं अपत्य अडथळा होऊ नये या कारणातून पित्याने मुलीची हत्या केल्याची चर्चा मुखेड तालुक्यात सुरु आहे. अद्याप अधिकृतरित्या हत्येचं कारण पोलिसांनी स्पष्ट केलं नाही.

आरोपी पांडुरंग कोंडामंगले हा मुखेड तालुक्यातील केरूर गावातील रहिवासी आहे. त्याचा बाऱ्हाळी येथे कटिंगची दुकान असून त्याला तीन आपत्य आहे. तीन दिवसा पूर्वी पांडुरंग कोंडामंगले याने साहित्य खरेदीसाठी जात असल्याचे पत्नीला सांगून सात वर्षाची चिमुकली प्राची कोंडमंगले हिला सोबत घेऊन गेला. त्यानंतर तेलंगणा राज्यातील कट्टापल्ली परिसरात बोधन रोडवरील केनॉलमध्ये फेकून दिले. त्यानंतर तो घरी एकटाच परत आला. इकडे केनॉलमध्ये चिमुकलीचा मृतदेह आढळून आल्याने परिसरात एकच खळबळ उडाली होती. घटनेची माहिती मिळताच तेलंगणा पोलिसांनी तपास सुरू केला. पुढील चौकशीत संशय बळावल्याने ३० जानेवारी रोजी तेलंगणा पोलिसांनी मुखेड शहरात येऊन पांडुरंग कोंडामंगले यांना ताब्यात घेतले आणि अटक केली. या घटनेनेनंतर विविध चर्चेला उधाण आलं. आर्थिक विवंचनेतून हा प्रकार घडल्याच बोलल्या जातं आहे. तर दुसरीकडे आगामी ग्रामपंचायत निवडणुकीत पांडुरंग कोंडामंगले हा सरपंच पदाचा उमेदवार म्हणून रिंगणात उतरण्याची त्याची तयारी असल्याची चर्चा होती. अद्याप हत्येचा तपास पोलीस करत आहेत.