मुंबई HCचा मोठा निर्णय! अनिता अडवाणींची याचिका फेटाळली; राजेश खन्नांसोबतचं ‘वैवाहिक नातं’ मान्य नाही
मुंबई : दिवंगत सुपरस्टार राजेश खन्ना यांच्यासोबतचे आपले नाते ‘वैवाहिक’ असल्याची कायदेशीर मान्यता मिळावी, या मागणीसाठी अभिनेत्री अनिता अडवाणी यांनी दाखल केलेले अपील मुंबई उच्च न्यायालयाने फेटाळले आहे.
या याचिकेत, त्यांनी दिवंगत अभिनेते राजेश खन्ना यांच्यासोबतच्या आपल्या नात्याला विवाह म्हणून कायदेशीर मान्यता मिळावी अशी मागणी केली होती.
न्यायमूर्ती शर्मिला देशमुख यांच्या एकलपीठाने दिंडोशी दिवाणी न्यायालयाच्या २०१७ मधील निर्णयाला दुजोरा देत अडवाणी यांचे अपील नामंजूर केले. “प्रथम अपील फेटाळण्यात येत आहे,” असे स्पष्ट करत न्यायालयाने हा निकाल दिला. सविस्तर आदेशाची प्रत अद्याप उपलब्ध झालेली नाही.
अडवाणी यांनी आपल्या याचिकेत, राजेश खन्ना यांच्यासोबत दीर्घकाळ ‘विवाहासमान’ नात्यात राहिल्याचा दावा केला होता. तसेच त्यांच्या मालमत्तेत वाटा आणि ‘आशीर्वाद’ या बंगल्यात राहण्याचा हक्कही त्यांनी मागितला होता.
दरम्यान, २०१५ मध्ये उच्च न्यायालयाने डिंपल कपाडिया, ट्विंकल खन्ना आणि अक्षय कुमार यांच्याविरोधातील कौटुंबिक हिंसाचाराची कार्यवाही रद्द केली होती. त्या वेळी न्यायालयाने अडवाणी आणि राजेश खन्ना यांचे नाते ‘विवाहासमान’ ठरत नसल्याचे निरीक्षण नोंदवत, घरगुती हिंसाचार कायदा २००५ अंतर्गत त्यांची तक्रार ग्राह्य धरता येत नसल्याचे स्पष्ट केले होते.
राजेश खन्ना यांच्या निधनानंतर ‘आशीर्वाद’ या बंगल्यातून आपल्याला बाहेर काढण्यात आल्याचा आरोपही अडवाणी यांनी याचिकेत केला होता.
