HPV vaccine myths vs facts : कोविडपासून HPV पर्यंत, भितीची साखळी तोडा, येणाऱ्या पिढीला कॅन्सरपासून वाचवा

हा एका लसीचा प्रश्न नाहीये... वरवर बघता आपल्याला असे वाटते की हे सर्व एका लसीविरुद्ध चालू आहे.

जेव्हा कोविडची लस आली तेव्हा देखील त्याविरुद्ध शंका निर्माण करणे आणि त्यानंतर प्रत्येक प्रॉब्लेम लसीमुळेच झाला असे म्हणणे चालू होते. ती सुरुवातीला कुजबूज होती पण हळूहळू आता सर्वच लोकांना तसे "वाटते". अभ्यासातून असे सिद्ध झालेले नाही, फक्त अशी भावना निर्माण झाली आहे. भावना विचार करत नाही. लाखो लोकांविषयी झालेले सर्व अभ्यास खोटे आहेत असे म्हटले तरी आता लोक लगेच विश्वास ठेवत आहेत. कारण Epstein files ने समाजातील विश्वास संपवला आहे. लस कंपन्या बनवतात. मान्य. मात्र लसीकरणामुळेच आपले जीवनमान सुधारले आणि बालपणातील जीवघेणे आजार नियंत्रित झाले हे सत्य नाकारणे योग्य नाही ना. जेव्हा रिअल वर्ल्ड डेटा उपलब्ध असतो, तो देखील नाकारणे हा कोणता शहाणपणा.

लक्षात घ्या. सुरुवात कोविडच्या लसीपासून झाली. त्यानंतर आता लस सुरक्षित असल्याचे भारंभार पुरावे उपलब्ध असताना देखील एचपीव्ही लसीचा विरोध अतिशय सिस्टिमॅटिक पद्धतीने आणि दबावतंत्राचा वापर करून सुरू आहे. मानवी मेंदूला जोखीम आकडेवारीतून समजण्याची क्षमता नाही. त्यामुळे प्रत्येक गोष्टीची जोखीम त्यांना सारखीच वाटते.

हे इथेच थांबणार नाहीये. सोबत एक कमेंटचा फोटो दिला आहे. असे कितीतरी लोक असतील जे मुलांसाठीचे लसीकरण देखील टाळण्याचा प्रयत्न करतील. युवाल म्हणतो की मानव प्राणी यासाठी वेगळा आहे कारण तो cooperation करू शकतो, एकत्रितपणे एकसंघ गटकृती करू शकतो. लसीकरण त्याचे सर्वात सुंदर उदाहरण आहे. भविष्यामध्ये केवळ भीतीपोटी लस नाकारण्याचे प्रमाण वाढणार आहे. जे आजार डॉक्टरकी शिकताना तुम्ही कधीच बघितले नव्हते ते आजार मोठ्या प्रमाणात बघायला मिळणार आहेत. आरोग्य आपल्याला सर्वोत्तम आयुष्य देते आणि आजार आपल्या आयुष्याची प्रतवारी कमी करतात. त्यामुळे विनंती आहे की निर्णय भावनेने नाही तर विचारपूर्वक घ्या. प्रश्न विचारत रहा. योग्य शास्त्रीय माहिती मिळवत राहा आणि त्यानंतर योग्य निर्णय घ्या. मनातील भीतीवर मात करणे सोपे नाही. भीती आपल्या जगण्याची सर्वात प्राचीन प्रेरणा आहे. मात्र विचारी मेंदू भीती कमी करण्यासाठी मदत करू शकतो.

कोणीही कोणतेही दावे केले की पुरावे मागा. ते स्वतः तपासून बघा.

उदा. लसीमुळे 7 मृत्यू झाले. किंवा पार्लमेंटरी कमिटी मृत्यूची चौकशी करण्यासाठी होती.

ही वाक्ये सत्य आहेत पण पूर्ण सत्य नाहीत.

✓ 7 मृत्यूची कारणे वेगळी असल्याने लसीसोबत त्या मृत्यूंचा संबंध नसल्याचा निर्वाळा दिलेला आहे.

✓ 72 वा संसदीय समितीचा रिपोर्ट जर बघितला इतर त्याच्या नावामध्ये समिती निर्माण करण्याचे कारण दिले आहे- "अभ्यासामधील कथित अनियमितता तपासणे बाबत"

जोपर्यंत तुम्ही प्रत्येक दाव्याची सत्यता बघणार नाही तोपर्यंत तुमच्या लक्षात येणार नाही की तुमच्या मनातील भीतीचा वापर करून भविष्यातील तुमच्या अडचणी वाढल्या जातील. लोकांचे भले करण्याची इच्छा असणे चुकीचे नाही. मात्र प्रत्येक गोष्ट पुन्हा पुन्हा तपासून पाहणे खूप आवश्यक आहे. Real world data दुर्लक्ष करता कामा नये. तुम्हाला जर हे पटत असेल तर इतरांपर्यंत अवश्य पोहोचवा कारण मिस इन्फॉर्मेशन जेवढी मोठी असते तेवढीच मोठी इन्फॉर्मेशन असणे पण महत्त्वाचे असते. आपल्या पुढील पिढ्यांच्या सुरक्षेसाठी आपण आत्तापासून विज्ञानावर आधारित कृती करायला हवी. अन्यथा लसीला घाबरून आणि नाकारून डॉक्टर आणि वकील यांच्यासाठी तरी भविष्यात खूप मोठा धंदा निर्माण होणारच आहे.

डॉ प्रिया प्रभू, मिरज MD PSM

रोगप्रतिबंधक शास्त्र तज्ञ

HPV Vaccine News, HPV Vaccine Safety, HPV Vaccine Awareness, HPV Vaccine Facts, HPV Vaccine Controversy, Vaccine Misinformation, Vaccine Hesitancy, Vaccine Safety Debate, Covid Vaccine Myths, Vaccine Awareness Campaign