म्युच्युअल फंडातून चांगला परतावा कसा मिळावाल?

गुंतवणूकदारांसाठी म्युच्युअल फंड हा सुरक्षित, सोयीस्कर आणि दीर्घकालीन संपत्ती निर्माण करणारा पर्याय मानला जातो. मात्र फक्त गुंतवणूक केल्याने चांगला परतावा मिळतोच असे नाही. त्यासाठी काही महत्त्वाच्या बाबी लक्षात घेणे अत्यावश्यक आहे. आर्थिक तज्ज्ञांच्या मते, पुढील पाच गोष्टी गुंतवणूकदारांनी लक्षात ठेवल्यास म्युच्युअल फंडातून अधिक चांगला फायदा मिळू शकतो.

१. गुंतवणुकीचे उद्दिष्ट स्पष्ट असावे

म्युच्युअल फंडात पैसे गुंतवण्यापूर्वी आपले उद्दिष्ट स्पष्ट करणे गरजेचे आहे. उदाहरणार्थ, मुलांच्या शिक्षणासाठी निधी जमवायचा आहे का, की निवृत्ती नियोजन करायचे आहे? अल्पकालीन आणि दीर्घकालीन उद्दिष्टानुसार योग्य फंड निवडल्यास परताव्याबाबत अपेक्षा पूर्ण होतात.

२. योग्य फंडाची निवड

बाजारात इक्विटी, डेट, हायब्रिड, लिक्विड अशा विविध प्रकारचे फंड उपलब्ध आहेत. प्रत्येक फंडाचा जोखीम पातळी आणि अपेक्षित परतावा वेगळा असतो. आपल्या जोखमीची तयारी आणि गुंतवणुकीचा कालावधी पाहून फंड निवडला तर स्थिर परतावा मिळतो.

३. दीर्घकालीन गुंतवणुकीचा दृष्टिकोन

शेअर बाजारातील चढ-उतारामुळे म्युच्युअल फंडाचे युनिट्स अल्पकालीन काळात वरखाली होतात. मात्र दीर्घकालीन गुंतवणुकीत हे चढ-उतार संतुलित होतात आणि चांगला परतावा मिळतो. किमान ५ ते ७ वर्षांचा कालावधी लक्षात घेऊन गुंतवणूक केली तर अधिक फायदा मिळू शकतो.

४. एसआयपी (SIP) ची सवय लावा

लहान रकमेपासून सुरू होणारी ‘सिस्टेमॅटिक इन्व्हेस्टमेंट प्लॅन’ ही पद्धत गुंतवणूकदारांसाठी फायदेशीर ठरते. दर महिन्याला ठराविक रक्कम गुंतवल्याने ‘रुपी कॉस्ट अॅव्हरेजिंग’चा लाभ मिळतो. तसेच गुंतवणुकीत शिस्त राहते आणि दीर्घकाळात मोठा निधी उभा राहतो.

५. फंडाचे नियमित पुनरावलोकन

गुंतवणूक केल्यानंतर ती विसरून चालत नाही. निवडलेल्या फंडाचा परफॉर्मन्स दर काही महिन्यांनी तपासणे आवश्यक आहे. जर फंड बाजाराच्या तुलनेत सतत कमी परतावा देत असेल, तर योग्य बदल करणे हितावह ठरते.