Epstein Files मोदी राजवटीच्या काळ्या अध्यायाची पोलखोल करणारे दस्तऐवज !

India-US Relations लोकसभेचे प्रतिपक्ष नेते राहुल गांधी यांनी काल लोकसभेत Jeffrey Epstein एपस्टीन फाईल्समध्ये अनिल अंबानी यांचे नाव आल्याचा उल्लेख करताच संपूर्ण केंद्र सरकारची ताकद राहुल गांधीना गप्प बसवण्यात खर्च होताना दिसली. राहुल जे बोलते आहे तेच सत्य असून देशाचा पंतप्रधान उद्योजकाचा जमुरा आहे हे एपस्टीन फाईल्स मधून उघड झाले. मोदीमित्र आणि भारतीय उद्योगपती अनिल अंबानी व जेफ्री एपस्टीन या दोघांमधील खासगी संदेश आणि ईमेल्समधून व्यवसाय, जागतिक राजकारण आणि वैयक्तिक बाबींची चर्चा समोर आली आहे. हे संवाद २०१७ ते २०१९ या काळातील आहेत, ज्यात एपस्टीनने अंबानींना मजा करण्यासाठी "उंच स्वीडिश गोरी स्त्री" ची व्यवस्था करण्याचा उल्लेख केला आहे.

फेब्रुवारी २०१७ मध्ये दुबई पोर्ट्स वर्ल्डचे सीईओ 'सुलतान अहमद बिन सुलायेम' यांनी एपस्टीनला अंबानींचा संपर्क क्रमांक / ईमेल दिला. त्यानंतर दोघांमध्ये नियमित संपर्क सुरू झाला. मार्च २०१७ मध्ये अंबानींनी एपस्टीनला "कोण सुचवता?" असा प्रश्न विचारला. ज्यावर एपस्टीनने "एक उंच स्वीडिश गोरी स्त्री, भेटीला मजेदार बनवण्यासाठी" असे उत्तर दिले. अंबानींनी अवघ्या २० सेकंदांत "तशी व्यवस्था करा" असे सांगितले. मार्च २०१७ मध्येच अंबानींनी दिल्लीतील "नेतृत्वा"च्या विनंतीवर एपस्टीनकडून मदत मागत असल्याचे नमूद केले आहे. आता दिल्लीतील नेतृत्व कोण? हे सांगण्याची आवश्यकता नाही.

वास्तविक हा प्रकार अमेरिकन राष्ट्राध्यक्ष डोनाल्ड ट्रम्प यांचे जावई जॅरेड कुश्नर आणि स्टीव्ह बॅनन यांच्याशी भेटीची व्यवस्था करणेबाबत होते. पंतप्रधान नरेंद्र मोदींच्या जून २०१७ च्या अमेरिका दौऱ्याच्या तयारीसाठी हा प्रकार सुरु होता.

जेफ्री एपस्टीनने कुश्नर आणि बॅनन व्यस्त असल्याचे सांगितले, पण मदत करण्याचे आश्वासन दिले. जुलै २०१७ मध्ये एपस्टीनने एका ईमेलमध्ये म्हटलंय की, "मोदींनी त्याचा सल्ला घेतला आणि अमेरिका-इस्रायल दौरे यशस्वी झाले." मार्च २०१८ मध्ये एपस्टीनने अंबानींना पॅरिसमध्ये बॅननशी भेटण्याचे आमंत्रण दिले, तर एप्रिल २०१९ मध्ये अंबानींनी कॉर्पोरेट फायनान्सिंगसाठी मदत मागितली. मे २०१९ मध्ये, लोकसभा निवडणूक निकालाच्या दिवशी न्यूयॉर्कमध्ये भेटीची योजना आखली गेली. १४ ते २० मे दरम्यान दोघांनी २३ मे ची भेट निश्चित केली. अंबानी एपस्टीनच्या न्यूयॉर्क टाउन हाऊसमध्ये दुपारी ४:३० वाजता पोहोचले. भेटीनंतर एपस्टीनने बॅननला संदेश पाठवला की, "मोदींनी कोणाला तरी पाठवले आहे."

केंद्र सरकारकडे स्वतःचं परराष्ट्र खाते आणि मनुष्यबळ असताना अशा दलालांची गरज पडते यातूनच केंद्र सरकारचा भ्रष्ट आणि भोंगळ कारभार देशाविषयी गद्दारी उघडकीस येते. दुसऱ्या दिवशी एपस्टीनने अंबानींना सुचवले की, "मिस्टर मोदींना स्टीव्ह बॅननशी भेटणे आवडेल, तुम्हा सर्वांना चीनची समस्या आहे." त्यावर अंबानींनी "शुअर" असे उत्तर दिले. या संवादांमध्ये पॅरिस आणि न्यूयॉर्कमध्ये भेटींच्या योजना होत्या. ११ मार्च २०१७ ची पॅरिस भेट फ्रेंच राष्ट्राध्यक्ष फ्रांस्वा ओलांद यांच्याशी डिनरमुळे रद्द झाली. यात राफेल डीलचा संदर्भही येतो, ज्यात अंबानींची कंपनी सामील होती आणि मोदींच्या २०१५ च्या फ्रान्स दौऱ्यात ऑफसेट करार झाला होता. आता सरकार हे संदेश सरकारशी जोडले जाऊ नयेत असे सांगतंय. पण एपस्टीन फाईल्स मोदी राजवटीच्या काळ्या अध्यायाची पोलखोल करणारे दस्तऐवज असून या दस्तऐवजांमुळेच मोदी राजवटीला उतरती कळा लागली आहे.

सुरुवातीला एपस्टीन फाईल्सवर राहुल बोलले असते तर प्रचंड टिका आणि खिल्ली उडवली गेली असती. त्यामुळे प्रकृतीच्या कारणास्तव दिल्ली मुक्कामी असलेले काँग्रेसचे जेष्ठ नेते आणि राज्याचे माजी मुख्यमंत्री पृथ्वीराज चव्हाण बाबा यांनी सर्वात अगोदर एपस्टीन फाईल्सचा बाँम्ब भारतीय राजकारणात फोडला. आता राहुल गांधी यांनी संसदेत व काँग्रेस पक्षाने रस्त्यावर हा मुद्दा लावून धरला की, मोदींना राजीनामा द्यावाच लागेल. कदाचित् यातूनच पहिल्या मराठी पंतप्रधान पदाचा मार्ग खुला होईल. यासाठी थोडा काळ वाट पहावी लागेल.

- तुषार गायकवाड