Types of Negative Male : आयुष्यात भेटणाऱ्या नकारात्मक पुरुषांबद्दल !

आजकाल काहीही लिहायला सुरुवातीला डिसक्लेमर देणे बंधनकारक झालं आहे. तसेच हेही एक - माझ्या आयुष्यात खूप सारे चांगले पुरुष आहेत - मित्र, मार्गदर्शक, हितचिंतक, नातेवाईक, भाऊ, सहकारी, ओळखीचे, अनोळखी, शेजारी पाजारी वगैरे. ही पोस्ट आयुष्यात भेटणाऱ्या नकारात्मक पुरुषांबद्दल आहे. नकारात्मक/ डोक्यात जाणाऱ्या / त्रासदायक पुरुषांचे विविध प्रकार Types of Negative Male

1. पहिला बाळबोध प्रकार - त्यांना मला अक्कल आहे हे मान्य नसते. त्यामुळे लगेच ते शिकवण्याच्या भूमिकेत जातात. (न विचारता.) मग ते राजकारण, समाजकारण, इथपासून ते लिंगभेद, माझे लिखाण, माझं वैयक्तिक आयुष्य, माझे कपडे, साडी, केस, वजन, असा कुठलाही विषय त्यांना चालतो. ते प्रत्येकात सर्वज्ञानी असतात. मी मूर्ख आहे, हे त्यांनी गृहीत धरलेलं असतं आणि त्यांनी मला शिकवलं नाही तर माझे आयुष्यच बरबाद होणार, या उदात्त हेतूने ते संधी मिळेल तसे फ्रीमध्ये शिकवत राहतात.

अशांना मी चुकून कधी भेटलेच तर स्वतःच्या तोंडात मारून घेते आणि पुन्हा भेटत नाही.

2. दुसरा प्रकार - यांनाही वाटत असतं की मला अक्कल नाहीच. फक्त त्यांना मी चिडकी आहे हे माहित असतं. म्हणून हे खूप खूप गोड बोलतात. कौतुक करतात. तू किती हुशार अशा कौतुकाच्या मखलाशी आडून, मला शिकवायला जातात. त्यांना वाटतं, हिला कळणारच नाही. आपण गोड बोलून, हिला जरा चार गोष्टी शिकवू.

पूर्वी मला हे कळायचं नाही. अनेक पुरुषांनी हे प्रकार केल्याने, आता हे पटकन ओळखू येतात.

3. तिसरा प्रकार - हे मदत करायची ऑफर देतात, गाजर दाखवतात. आपण विश्वास ठेवून वेळ दिला की झालं, पूर्ण वेळ त्यांचं स्वतःचं कौतुक, इतर थोर पुरुषांचं आणि पुन्हा पुरुषी थाटात अक्कल शिकवणे या auto mode मध्ये जातात.

4. चौथा प्रकार - यांना खात्री असते की मला मोठ्या विषयांचं, जसं की राजकारण, समाजकारण, अर्थकारण यांचं ज्ञान नाही. पण मला थोडीबहुत अक्कल आहे हे माहिती असल्याने, हे अक्कल शिकवायला जात नाही. यांना माहिती असतं की हिला मूर्ख बनवता येणारं नाही. मग हे गोड बोलतात, खाऊ पिऊ घालतात आणि डायरेक्ट बाहेरचा रस्ता दाखवतात. चुकूनही संधी किंवा व्यासपीठ मिळू देत नाहीत. ते व्यवस्थित इतर पुरुषांना आणि त्यांचं ऐकणाऱ्या स्त्रियांना प्रोमोट करतात.

5. अंगाला खेटणारे पुरुष - कुठल्याही वयोगटाचे, कुठल्याही staus चे पुरुष, यांना वाटतं स्त्रीला मदत करायची, मार्गदर्शन करायचे तर त्याचा काहीतरी स्पेशल मोबदला मिळायलाच हवा. मग ते तोंडी फ्लर्टींग असेल, किंवा निसटता स्पर्श किंवा पुरुषाची जी कुवत /हिम्मत /गरज असेल, त्यानुसार. पहिल्याच भेटीत कुठल्या स्त्रीकडून काय मिळेल, याचे यांचे यांचे हिशेब चालू असतात. बिचाऱ्या बाईला याचा पत्ताही नसतो. अनेकवेळा मी फसले आहे. वाघाच्या गुहेत अडकल्याचा फील येतो, स्वतःला वाचवत, पळून यावं लागतं.

6. Creepy पुरुष - पहिल्याच फोन कॉलमध्ये किंवा भेटीत हे असे काही विचित्र, तुम्हाला uncomfortable करणारं बोलतात की तुम्हाला तोंडात झुरळ आल्याचा फील यावा. आणि साल्यांना आपण काही चुकीचं बोललो हेही भान नसतं. अशांना मी लगेच लाल फुली मारून बाद करते. कधी आपलंच समजून घ्यायला चुकलं असेल म्हणून पुन्हा संधी द्यायला जाते तर पुन्हा साले तसलंच काहीतरी creepy बोलतात. मग कायमचे बाद. ब्लॉक.

7. मोकळं बोलणारी, हसून वागणारी बाई, ही 'उपलब्ध आहे' असे समजणारे पुरुष. अनेकदा मैत्री झाल्यानं मी निवांत बोलते. स्वतःच्या आयुष्यातील टेन्शन शेअर करते. समोरच्या पुरुषाचं कौतुक करते. कारण मी प्रत्येकाकडे माणूस म्हणून पाहते, नाकी gender म्हणून. पण आपण broad minded असलो तरी समोरचा कोत्या मनोवृत्तीचा असला की तो वेगळा अर्थ घेतो. मित्र म्हणून आपण टाळी द्यावी तर हा मुके घ्यायला आणि झोपायलाच मागे लागतो. फार फार वाईट वाटतं इथे की पुरुषांच्या असल्या वागण्यानं चांगली मैत्री नासते. संवाद संपतो. मैत्र संपून, केवळ अवघडलेपण मागे उरतं. इच्छाच होत नाही पुन्हा त्याचं तोंडसुद्धा पहायची.

8. आता असे पुरुष, ज्यांना माहिती असतं की ही बया तापट आहे. त्यात त्यांना आपण मुळीच आवडत नसतो. ते आपल्याला बघून आधीच एक किलोमीटर दूर राहतात. आधी मला हे बरे वाटायचे की निदान तिरस्कार आहे, तो डायरेक्ट तोंडावर. पण मग आता लक्षात येऊ लागलं की वरकरणी वाटतं की हे neutral आहेत. पण ते तसे नसतात. ते मागे तुमच्याबद्दल काड्या करत राहतात, वाईट वाईट बोलतात, गॉसिप करुन, तुमचे सपोर्ट तोडू पाहतात.

9. आणखी एक कॅटेगरी. हे मित्र आहेत असे दाखवतात. तुमच्या स्वभावाचा यांना फायदा हवा असतो. एकटे असताना तुमचे कौतुक करतील, प्रोत्साहन देतील. पण पब्लिक प्लेसमध्ये तुम्ही स्त्री असल्यानं, तुम्हाला सोबत उभे राहू देतील, पण ते मुक्यानं. आपण फक्त त्यांचं, बाकी थोर पुरुषांचं बोलणं, हसणं ऐकून घ्यायचं, मान डोलवायची. बोलणार फक्त पुरुष. हे असे खोटे मित्र कधीही तुम्हाला मदत करणार नाहीत, तुमचं वाचणार नाहीत, चारचौघात तुमचं कौतुक करणार नाहीत. फक्त गोड बोलून, तुमच्या गुड बुक्स मध्ये रहायला, तुमची शिडी करुन वर जायला बघतील.

10. आणखी एक प्रकार. हे तुमचं वाचतात. यांना आवडतं. फोन, मेसेज करवून कळवतील. पण पब्लिकमध्ये चुकूनही बोलणार नाहीत. एकतर अशा स्त्रीवादी स्त्रीचं मी वाचतो आणि मला ते पटतं, हे सार्वजनिकरित्या मान्य करायचं नसतं. किंवा त्यांना स्त्री ही व्यक्ती तितकी महत्वाची वाटतच नाही की तिला recognition मिळावं. स्त्रीचं लेखन म्हणजे येता जाता केलेलं, त्याचं इतकं काय विशेष. मुख्य महत्वाचं लिहितात ते पुरुष. त्यांच्याबद्दल हे पानं भरभरून कौतुक लिहितील.

सोबतच अशा मोकळ्या स्त्रीचं कौतुक केलं, तिच्यासोबत आपला फोटो बिटो दिसला तर लोक वेगळा अर्थ काढतील ही सुद्धा भीती.