वृत्तनिवेदक आणि सूत्रसंचालक प्रदीप भिडे यांचे निधन

डीडी सह्याद्रीवरील सुप्रसिध्द वृत्तनिवेदक आणि सूत्रसंचालक प्रदीप भिडे यांचे निधन झाले आहे. भिडे यांचे प्रदीर्घ आजाराने मुंबईत निधन झाल्याची माहिती डीडी सह्याद्रीकडून ट्विटरवर देण्यात आली आहे.

मुंबई दूरदर्शन केंद्राची सुरवात २ ऑक्टोबर १९७२ रोजी झाली. प्रदीप भिडे हे एप्रिल १९७४ पासून दूरदर्शनमधे दाखल झाले. स्व. भक्ती बर्वे-इनामदार, ज्योत्स्ना किरपेकर, स्व. स्मिता पाटील-बब्बर हे सारे प्रदीप भिडे यांचे समकालीन तसेच सम-व्यावसायिक. त्या काळात मराठी बरोबरच हिंदी, इंग्रजीमधूनही बातम्या दिल्या जात. १९८४ पासून, जेव्हा नॅशनल नेटवर्क सुरू झाले, तेंव्हापासून, हिंदी व इंग्रजी बातम्या दिल्लीहून प्रसारीत केल्या जाऊ लागल्या. वयाच्या २१ व्या वर्षी श्री. भिडे यांनी बातम्या द्यायला सुरवात केली दूरदर्शनच्या वृत्तविभागामधे अनुवादक म्हणून त्यांनी सुरुवात केली होती.

एकंदर २५ वर्षांच्या बातम्या देण्याच्या अनुभवामधे धक्कादायक, दु:खद किंवा चित्तथरारक बातम्या देण्याचा प्रसंग भिडे यांच्यावर अनेक वेळा आला. भारताचे माजी पंतप्रधान राजीव गांधी यांची हत्त्या, ख्यातनाम पार्श्वगायक महमद रफी यांचे निधन, मुंबईचा भीषण बॉम्बस्फोट, अशा घटनांची बातमीपत्रे भिडे यांनीच वाचली होती.