#Tokyo2020 : महिला हॉकीत सुवर्ण पदकाचे स्वप्न भंगले, पण जिगरबाज खेळाडूंनी जिंकली मनं
टोकीयो ऑलिंपिकमध्ये भारतीय महिला हॉकी संघाचा अत्यंत अटीतटीच्या लढाईत अर्जेटिंनाने पराभव केला आहे. उपांत्य फेरीच्या या अटीतटीच्या लढतीत अर्जेंटीनाने भारताचा २-१ ने पराभव केला आहे. यामुळे भारतीय महिला संघाचे सुवर्ण पदकाचे स्वप्न भंगले आहे. पण भारतीय महिला संघाने केलेल्या जिगरबार खेळाचे सर्वत्र कौतुक होत आहे. पुरूष संघापाठोपाठ महिला देखील पराभुत झाल्याने भारताच्या हॉकीमधील सुवर्णपदकाचं स्वप्न यंदा अर्धवटच राहिलं आहे. पण आता महिला हॉकी संघाला कांस्य पदक जिंकण्याची संधी आहे.
भारताच्या कांस्य पदकाच्या आशा अजूनही कायम आहेत. यासाठी भारतीय महिला संघाला ग्रेट ब्रिटनला शुक्रवारी ६ ऑगस्ट रोजी होणाऱ्या लढतीत पराभूत करावे लागणार आहे. दुसरीकडे भारतीय पुरुष संघ गुरूवारी ५ ऑगस्ट रोजी जर्मनीच्या संघासोबत कांस्यपदकासाठी भिडणार आहेत. भारतीय महिला संघ यापुर्वीही ग्रेट ब्रिटन समोर उभा ठाकलेला आहे. पण त्यावेळी भारताचा पराभव झाला होता. कांस्यपदकासाठी भारतीय महिला संघ हे कडवं आव्हान कसे पेलतो ते पाहणे महत्त्वाचे ठरणार आहे.
*भारतासाठी बुधवारचा दिवस संमिश्र*
भारतासाठी टोकियो ऑलिम्पिकमधील बुधवारचा संमिश्र राहिला. दिवसाच्या सुरुवातीला नीरज चोप्राने अचुक नेम साधत भाला फेकीच्या अंतिम फेरीमध्ये प्रवेश केला. कुस्तीपटू रवि कुमार दहिया याने कुस्तीच्या ५७ किलो वजनी गटात उपांत्य फेरीत विजय मिळवत अंतिम फेरी गाठली आहे. त्यामुळे देशासाठी किमान रौप्य पदक त्याने निश्चित केले आहे. मात्र दीपक पूनिया ८६ किलो वजनी गटात उपांत्यफेरीत पराभूत झाला आहे. दुसरीकडे बॉक्सर लव्हलीना बॉर्गोहेन देखील उपांत्य फेरीत पराभूत झाली आहे. पण बॉक्सिंगच्या नियमांनुसार तिला कांस्य पदक मिळाले आहे.
