इयत्ता दहावी तसेच बारावी पुरवणी परीक्षेचा निकाल दुपारी 1 वाजता जाहीर होणार
मुंबई : महाराष्ट्र राज्य माध्यमिक व उच्च माध्यमिक शिक्षण मंडळावतीने घेण्यात आलेल्या इयत्ता दहावी तसेच बारावी पुरवणी परीक्षेचा निकाल(maharashtra ssc hsc board supplementary exam 2021 result)
आज (दि.20 ऑक्टोबर) रोजी जाहीर केला जाणार आहे. आज दुपारी एक वाजता www.mahresult.nic.in या संकेतस्थळावर हा निकाल जाहीर होणार आहे, अशी माहिती शालेय शिक्षणमंत्री वर्षा गायकवाड यांनी दिली आहे.
महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, औरंगाबाद, मुंबई, कोल्हापुर अमरावती, नाशिक, लातूर व कोकण या नऊ विभागीय मंडळामार्फत दिनांक 22 सप्टेंबर 2021 ते 8 ऑक्टोबर 2021 या कालावधीत इयत्ता दहावीची पुरवणी परीक्षा तर
दिनांक 16 सप्टेंबर 2021 ते 12ऑक्टोबर 2021 या कालावधीत इयत्ता बारावीची पुरवणी परीक्षा घेण्यात आली होती. या परीक्षेचा निकाल आज जाहीर होणार आहे.
ऑनलाईन निकालानंतर लगेचच दुसऱ्या दिवसापासून इयत्ता दहावी व बारावी पुरवणी परीक्षेस प्रविष्ट झालेल्या विद्यार्थ्यांना स्वतःच्या अनिवार्य विषयांपैकी कोणत्याही विशिष्ट विषयात त्यांनी संपादित केलेल्या गुणांची गुणपडताळणी व उत्तरपत्रिकांच्या छायाप्रत, पुनर्मूल्यांकन व स्थलांतर प्रमाणपत्रासाठी त्यांच्या विभागीय मंडळाकडे ऑनलाईन पद्धतीने मंडळाच्या अधिकृत संकेतस्थळावरून दहावीसाठी http://verification.mh-ssc.ac.in व बारावीसाठी http://verification.mh-hsc.ac.in स्वतः किंवा शाळा किंवा महाविद्यालयामार्फत अर्ज करण्याची सोय उपलब्ध करून देण्यात आली आहे.
यासाठी आवश्यक अटी- शर्ती संबधीत संकेतस्थळावर देण्यात आल्या आहेत. गुणपडताळणीसाठी गुरुवार दि. 21 ऑक्टोबर ते शनिवार दि. 30 ऑक्टोबर 2021 पर्यंत व छायाप्रतीसाठी गुरूवार, दि. 21 ऑक्टोबर 2021 ते मंगळवार 9 नोव्हेंबर 2021 पर्यंत ऑनलाईन पद्धतीने अर्ज करता येणार आहे. तसेच ऑनलाईन पद्धतीने शुल्क भरता येणार आहे अशी माहिती शिक्षण विभागाकडून देण्यात आली आहे.
