सुनेत्रा पवार विधानसभेवर बिनविरोध ? तर शरद पवार, पार्थ पवार राज्यसभेवर ?
मुंबई : दिवंगत उपमुख्यमंत्री अजित पवार यांच्या निधनानं रिक्त झालेल्या बारामती विधानसभा मतदारसंघात पोटनिवडणूक होणार आहे. या जागेसाठी उपमुख्यमंत्री सुनेत्रा पवार यांचं नाव राष्ट्रवादी काँग्रेसकडून निश्चित झालं असल्याची माहिती आहे. तर दुसरीकडे या जागेवर राष्ट्रवादी काँग्रेस (शरदचंद्र पवार) पक्षाकडून उमेदवार उभा केला जाणार की निवडणूक बिनविरोध होणार ? याविषयी खासदार सुप्रिया सुळेंनी महत्त्वाची माहिती माध्यमांना दिलीय.
बारामतीची पोटनिवडणूक बिनविरोध ?
अजित पवार यांच्या निधनानंतर बारामती विधानसभा मतदारसंघात पोटनिवडणूक घेण्याची तयारी निवडणूक आयोगाकडून सुरु झालीय. त्यामुळं साहजिकच या निवडणूकीकडे सर्वांचं लक्ष लागलेलं आहे. या रिक्त जागेवर राष्ट्रवादी काँग्रेसकडून सुनेत्रा पवार यांची उमेदवारी निश्चित आहे. याविषयी सुप्रिया सुळेंना प्रश्न विचारण्यात आला. त्यावर त्या म्हणाल्या, “ अर्थातच ही निवडणूक बिनविरोध होणार. दादा गेल्यानंतरची ही पोटनिवडणूक आहे. आपण सुस्कृंत आहोत. त्यामुळं नक्कीच ही निवडणूक बिनविरोध होईल” असा विश्वासही त्यांनी व्यक्त केला.
पार्थ पवार राज्यसभेवर ? ज्याचं त्यानं ठरवावं – सुप्रिया सुळे
दरम्यान, सुनेत्रा पवारांनी राज्यसभेच्या सदस्यत्वाचा राजीनामा आधीच दिलेला आहे. त्यामुळं त्या रिक्त झालेल्या जागेवर राष्ट्रवादी काँग्रेसकडून कुणाची वर्णी लागणार ? याविषयी विचारल्यावर सुप्रिया सुळे म्हणाल्या,” आपल्या संघटनेत काम करतांना त्यांनी काय करावं, हा त्यांचा अंतर्गत प्रश्न आहे” असं सांगत त्यांनी पार्थ पवारांच्या राज्यसभेतील उमेदवारीबाबत थेट बोलणं टाळलं.
शरद पवार राज्यसभेवर जाणार ?
दरम्यान, शरद पवारांच्या राज्यसभा सदस्यत्वाची मुदत संपणार आहे. त्यामुळं ते पुन्हा राज्यसभेत जाणार का ? याविषयी सुप्रिया सुळेंना प्रश्न विचारण्यात आला. शरद पवारांनी पुन्हा राज्यसभेवर जावं, ही आमची इच्छा आहे. यासंदर्भात महाविकास आघाडीतल्या शिवसेना आणि काँग्रेसच्या वरिष्ठ नेत्यांना भेटणार असल्याचं सुप्रिया सुळेंनी स्पष्ट केलंय.
