सुदर्शन कोतकरने पटकावला 'उत्तर महाराष्ट्र केसरी' किताब
अहमदनगर : अहमदनगर येथील पैलवान सुदर्शन महादेव कोतकर याने 'उत्तर महाराष्ट्र केसरी' हा किताब पटकावला आहे. नाशिक येथील बाळू बोडखे याला मात देत त्याने ही स्पर्धा जिंकली. महाराष्ट्र राज्य कुस्तीगीर परिषद, जिल्हा तालीम संघ आणि संघर्ष योद्धा बबनराव ढाकणे केदारेश्वर कारखान्याच्या वतीने दोन दिवसीय कुस्ती स्पर्धेचं आयोजन करण्यात आले होते.
अहमदनगर जिल्ह्यातील पाथर्डी येथे उत्तर महाराष्ट्र केसरी कुस्ती स्पर्धेचं आयोजन करण्यात आलं होतं. या स्पर्धेत अंतिम लढत नगर येथील सुदर्शन कोतकर आणि नाशिक येथील बाळू बोडखे यांच्यात पार पाडली. ज्यात नगरच्या सुदर्शन कोतकरने बाजी मारली. सुदर्शन कोतकरने चांदीची गदा पटकावली आहे.
सुदर्शन कोतकर आणि बाळू बोडखे यांच्यात तब्बल चाळीस मिनिटे कुस्ती रंगली होती. कोतकर यांचे वजन 124 किलो तर बोडखे यांचे वजन 84 किलो होते. मात्र, तरीही बोडखे यांनी कोतकरला सहजासहजी जिंकू दिले नाही. त्याने शेवटच्या क्षणापर्यंत झुंज दिली. मात्र, अखेर सुदर्शन कोतकर याने ही स्पर्धा जिंकली. तर, बाळू बोडखेला दुसऱ्या स्थानावर समाधान मानावे लागले. या स्पर्धेत तृतीय क्रमांक नगर येथील अनिल ब्राम्हणे याने पटकावला.
कोरोनाच्या पार्श्वभूमीवर बंद असलेल्या राज्यातील कुस्ती स्पर्धा आता सुरु झाल्यात. तब्बल दोन वर्षांनंतर पहिल्यांदाच पाथर्डी येथे भव्य कुस्ती स्पर्धेचं आयोजन करण्यात आलं होतं. या स्पर्धेत उत्तर महाराष्ट्रातील वेगवेगळ्या गटातील जवळपास 300 मल्ल सहभागी झाले होते.
