हाॅलमार्किंग व एच. यु. आय. डी. विरोधात लाक्षणिक संप

जळगाव : केंद्र सरकारने व राज्य सरकारने अव्यवहारीक पद्धतीने हाॅलमार्किंग व एच. यु. आय. डी. लागू केल्याचे म्हणत या विरोधात पाचोरा शहर सराफ असोसिएशनतर्फे एक दिवसीय लाक्षणिक संप पुकारण्यात आला आहे. शहर सराफ असोसिएशनतर्फे सराफ बाजारापासुन ते उपविभागीय अधिकारी कार्यालयालापर्यंत मोर्चा काढत विरोध दर्शविण्यात आला. यावेळी मोठ्या संख्येने सराफ बांधव उपस्थित होते.

सोन्यावर हाॅलमार्किंग प्रक्रियेच्या विरोधात आज एक दिवसाचा लाक्षणिक संप पुकारुन दिवसभर दुकाने बंद ठेवण्यात आली आहे. हाॅल मार्कचे आम्ही स्वागत करतो परंतु अव्यवहारीक पद्धतीने लागु केलेल्या हाॅलमार्किंग पद्धतीच्या विरोधात संपूर्ण महाराष्ट्रभर ज्वेलर्स, सराफ व सुवर्णकार ब्युरो ऑफ इन्वेस्ट इन स्टॅंडर्ड - १ नुसार त्रासदायक जाचक प्रक्रिया, ज्वेलर्सचे कोणतेही ओळख चिन्ह नाही, तसेच दागिन्यांची सुरक्षितता नाही, सोन्यावर हाॅलमार्किंग केल्यानंतर दागिन्यांमध्ये कुठलाही बदल करता येणार नाही. अशा जाचक अटींमुळे व तो मान्य नसल्यामुळे पाचोरा शहर सराफ असोसिएशनतर्फे एक दिवसीय लाक्षणिक संप पुकारण्यात आला आहे.

दरम्यान सराफ असोसिएशनतर्फे उपविभागीय अधिकारी डॉ. विक्रम बांदल यांना जाचक अटीं विषयीचे निवेदन देण्यात आले. यावेळी सराफ असोसिएशनचे अध्यक्ष सुरेश (नाना) देवरे, सेक्रेटरी कमलाकर जडे, खजिनदार प्रकाशशेठ जैन, सदस्य राजेश संघवी, किशोर सराफ, लक्ष्मणराव घाडगे, कांतीलाल जैन, निखिल सराफ, अनिल सराफ, राजेंद्र बाविस्कर, कांतीलाल बनोटीवाला सह असोसिएशनचे पदाधिकारी व सदस्य उपस्थित होते.