ST Bus Worker Strike : अनिल परबांची शिष्टाई फेल.. नेत्यांची माघार, कर्मचारी संपावर ठाम

मुंबई :शासनात विलिनीकरणाच्या मागणीसाठी राज्यात एसटी कामगारांचा संप सुरू आहे. त्यावर तोडगा काढण्यासाठी परिवहनमंत्री अनिल परब यांनी एसटी कामगार नेते अजयकुमार गुजर यांच्याशी चर्चा केल्यानंतर गुजर यांनी संप मागे घेत असल्याचे जाहीर केले. मात्र गुजर यांच्या निर्णय़ावर नाराजी व्यक्त करत एसटी कामगारांनी संप सुरूच ठेवणार असल्याचे जाहीर केले.

२९ ऑक्टोबरपासून विलिनीकरणाच्या मागणीसाठी एसटी कामगारांनी संप पुकारला आहे. मात्र त्यावर अजूनही तो़डगा निघाला नाही. तसेच एसटी कामगारांच्या संपामुळे ग्रामिण भागातील सर्वसामान्य नागरीकांचे प्रचंड हाल होत आहेत. तर एसटी बंद असल्यामुळे विद्यार्थी, शेतकरी, शेतमजूर यांचे प्रचंड हाल होत आहेत. त्यामुळे त्यांना प्रवासासाठी वेगळा पर्याय स्विकारावा लागत आहे. त्यामुळे त्यावर तोडगा काढण्याचा प्रयत्न राज्याचे परिवहनमंत्री अनिल परब करत होते. मात्र त्यात यश आले नाही.

त्यानंतर उच्च न्यायालयाने त्रिस्तरीय समिती स्थापन केली. या समितीचा प्राथमिक अहवाल २० डिसेंबर रोजी न्यायालयात सादर करण्यात आला. मात्र त्यावरील सुनावणी उद्या (ता. २२) पर्यंत स्थगित करण्यात आली आहे. त्यामुळे या पार्श्वभुमीवर एसटी महामंडळाचे अध्यक्ष अनिल परब यांनी कामगार नेते अजयकुमार गुजर यांच्यासोबत शिष्टाई केली. त्यात न्यायालयात प्रलंबित असलेला विलिनीकरणाचा मुद्दा वगळता संघटनेच्या इतर मागण्यांवर सकारात्मक चर्चा करून मार्ग काढला जाईल, असे सांगितले.

तर त्वरीत कामावर हजर होणाऱ्या संपकरी कामगारांवरील निलंबन, बडतर्फी, सेवासमाप्ती व बदलीच्या कारवाया मागे घेण्याचे ठोस आश्वासन परिवहनमंत्री अनिल परब यांनी दिले. त्यानंतर एसटी कामगार नेते व महाराष्ट्र राज्य कनिष्ठ वेतन श्रेणी एसटी कामगार संघटनेचे अध्यक्ष अजयकुमार गुजर यांनी संप मागे घेत असल्याची घोषणा करत कामगारांनी कामावर रूजू होण्याचे आवाहन केले. तर विलिनीकरणाचा मुद्दा न्यायालयाच्या कक्षात असल्याने तो मुद्दा सोडून अन्य मुद्द्यावर तातडीने बैठक घेऊन मार्ग काढण्याचे आश्वासन अनिल परब यांनी दिले. त्यानंतर एसटी कामगार नेते अजयकुमार गुजर यांनी संप मागे घेत असल्याची घोषणा केली. मात्र कामगारांनी अजयकुमार गुजर यांच्या निर्णयावर नाराजी व्यक्त करत विलिनीकरण होईपर्यंत संप सुरू ठेवणार असल्याची भुमिका घेतली.