पंजाबमधील मोर्चा प्रकरणी शिवसेनेची कारवाई, हरिश सिंगला यांची हकालपट्टी

Punjab: पंजाबमधील पटियाला येथे खलिस्तानवाद्यांविरुद्ध मोर्चा काढल्या प्रकरणी शिवसेनेचे नेते हरिश सिंगला यांना पक्षातून काढून टाकण्यात आले आहे. पटियालामध्ये शुक्रवारी हरीश सिंगला यांच्या नेतृत्वाखाली खलिस्तानवादी गटांच्या विरोधात कालिमाता मंदिर परिसरात मोर्चा काढण्यात आला होता. या संघटनेचे कार्यकर्ते आणि निहंग शीख यांच्यातील हिंसक संघर्ष टाळण्यासाठी पोलिसांना हवेत गोळीबार करावा लागला. यावेळी झालेल्या दगडफेकीत एक पोलीस अधिकारीही जखमी झाल्याचे कळते आहे.

शिवसेनेच्या कार्यकर्त्यांनी खलिस्तानविरोधात घोषणाबाजी केली. शिवसेनेचे पंजाब प्रदेश प्रमुख योगिराज शर्मा यांनी हरिश सिंगला यांची पक्षविरोधी कारवाया केल्याचे सांगत हकालपट्टी जाहीर केले आहे. खलिस्तानवाद्यांनी काही दिवसांपूर्वी पोलीस कार्यालयांच्या बाहेर खलिस्तान स्थापना दिन पाळण्याचे आवाहन केले होते. त्याविरुद्ध सिंगला यांनी मोर्चा काढण्याची घोषणा केली होती. सिंगला यांनी पक्षविरोधी कारवाया केल्याने त्यांची पक्षातून हकालपट्टी केल्याचे शर्मा यांनी प्रसिद्धीपत्रकात म्हटले आहे. पक्षप्रमुख उद्धव ठाकरे, युवा सेनाप्रमख आदित्य ठाकरे आणि शिवसेनेचे राष्ट्रीय सचिव अनिल देसाई यांच्या आदेशानुसार ही कारवाई करण्यात आल्याचे प्रसिद्धी पत्रकात म्हटले आहे. सिंगला यांनीकाढलेल्या मोर्चाशी पक्षाचा कोणताही संबंध नाही, असे त्यांनी सांगितले आहे.