शिवसेनेचे मंत्री संदिपान भुमरे यांच्या भावाकडून कार्यकर्त्याला मारहाण

औरंगाबाद // शिवसेनेचे मंत्री संदिपान भुमरे यांच्या भावाने कार्यकर्त्याला मारहाण केल्याचा धक्कादायक प्रकार औरंगाबादमधून समोर आला आहे. रस्त्याच्या कामाची तक्रार केल्याने ही मारहाण करण्यात आल्याची माहिती आहे. रणजित नरवडे असे मारहाण झालेल्या व्यक्तीचे नाव आहे. या प्रकरणात संदिपान भुमरे यांचे भाऊ राजू भुमरे यांच्यासह आठ जणांवर पाचोड पोलीस ठाण्यात गुन्हा दाखल करण्यात आला.

रणजित नरवडे यांनी रस्त्याच्या कामामध्ये भ्रष्टाचार झाल्याची तक्रार केली होती. 2018 मध्ये रस्त्याचे काम न करताच बोगस बिल उचलल्याचा आरोप त्यांनी केला होता. तक्रार केल्यानंतर घाईगडबडीने कामाला सुरुवात देखील करण्यात आली. मात्र याचा राग मनात धरून, संदिपान भुमरे यांचे भाऊ राजू भुमरे यांनी आपल्याला लाथा, बुक्क्याने मारहाण केली, अशी तक्रार नरवडे यांनी केली आहे.

विशेष म्हणजे रणजित नरवडे हे संदिपान भुमरे यांचे नातेवाईकच आहे. नरवडे हे भुमरे यांच्या मामाचा मुलगा आहे. राजू भुमरे यांनी आपल्याच मामाच्या मुलाला मारहाण केली. त्यामुळे तालुक्यात खळबळ उडाली असून, या प्रकरणी पाचोड पोलीस ठाण्यात संदीपान भुमरे यांचे भाऊ राजू भुमरे यांच्याविरोधात मारहाणीची तक्रार दाखल करण्यात आली आहे.