शरद पवार- अमित शाह यांच्या भेटीच्या चर्चेवर राष्ट्रवादीची प्रतिक्रिया

राष्ट्रवादी काँग्रेसचे राष्ट्रीय अध्यक्ष शरद पवार व प्रफुल पटेल यांची अहमदाबाद येथे अमित शहा यांच्यासोबत भेट झाल्याची चर्चा आहे. या चर्चेमुळे राज्यात राजकीय भूकंप होणार का अशी चर्चा सुरू झाली आहे. राज्यात गेल्या काही दिवसात घडलेल्या घटनांमुळे ठाकरे सरकारची कोंडी झाली आहे. त्यातच शिवसेना आणि काँग्रेसच्या नेत्यांमध्ये शाब्दिक चकमकी झडू लागल्या आहेत. यासर्व पार्श्वभूमीवर या भेटीबद्दल राज्याच्या राजकारणात मोठी खळबळ उडाली आहे.

पण आता राष्ट्रवादी काँग्रेसने याबद्दल स्पष्टीकरण दिले आङे. पवार आणि अमित शाह यांची कोणतीही भेट झालेली नाही. ही अफवा पसरवून संभ्रम निर्माण करण्यात आला आहे, अशी माहिती राष्ट्रवादी काँग्रेसचे राष्ट्रीय प्रवक्ते आणि अल्पसंख्याक मंत्री नवाब मलिक यांनी दिली. गेले दोन दिवस ट्वीटरवर बातम्या पसरवण्यात आल्या आणि दिव्यभास्करमध्ये लहान बातमी करुन चॅनेलवर बातम्या दाखवायला सुरुवात करण्यात आली. एका पत्रकाराकडून प्रश्न विचारुन संभ्रम निर्माण करण्याचा प्रयत्न स्वतः अमित शहा यांनी केला आहे असा आरोप नवाब मलिक यांनी केला आहे. ज्या बातम्या पसरवण्यात आल्या त्या खोट्या आहेत. कोणतीही भेट झालेली नाही. आणि भेटण्याचा उद्देश किंवा कारण असू शकत नाही असेही नवाब मलिक यांनी स्पष्ट केले.