62 लाखांचा दरोडा टाकणारी टोळी २४ तासात गजाआड ; संगमनेर पोलिसांची दमदार कामगिरी

अहमदनगर : संगमनेर तालुक्यातील लोणी-नांदूर शिंगोटे रस्त्यावर 21 टन अल्युमिनियम इगोटस घेऊन जाणाऱ्या ट्रकला अज्ञात लुटारूंनी लोहारे शिवारात आडवत लुटल्याची घटना घडली होती. या लुटारूंनी बळजबरीने ट्रक सिन्नरच्या दापुर या ठिकाणी नेत ड्रायव्हर आणि त्याच्या सहकाऱ्याला शेतामध्ये बांधून ठेवत ट्रक पळवून नेला होता. या घटनेचा संगमनेर पोलिसांनी अवघ्या २४ तासात तपास करत आरेपींच्या मुसक्या आवळल्या आहेत.

संगमनेर तालुका पोलिसांना या घटनेची माहिती मिळताच पोलीस निरीक्षक पांडुरंग पवार यांच्या मार्गदर्शनाखाली आरोपींना शोधण्यासाठी टीम रवाना करण्यात आली. नाशिक येथील एका पेट्रोल पंपावरील सीसीटीव्ही फुटेजच्या माध्यमातून ट्रकचा सुगाव पोलिसांना लागला. मात्र आरोपी पसार झाले होते. पोलिसांनी तात्काळ तपासाचे चक्र फिरवत सदर गुन्ह्यातील पाच आरोपींना 24 तासाच्या आत विविध ठिकाणाहून शोधून काढले आहे.

आरोपींवर संगमनेर तालुका पोलिस स्टेशनमध्ये गुन्हा नोंदविण्यात आला असून, दरोडा टाकणाऱ्या ह्या टोळीचा पर्दाफाश करणाऱ्या पोलिसांचे अहमदनगर जिल्हा अधीक्षक मनोज पाटील , जिल्हा उपअधीक्षक दिपाली काळे यांनी कौतुक केले आहे.तसेच ट्रकमधील अल्युमिनियम इगोटसचे मालक भुवन मोहनलाल जमशेदपूर यांनी संगमनेर पोलिसांचे आभार मानले आहेत.