'सोनिया सेनेच्या कार्यकर्त्यांकडून पोलीस यंत्रणेचा गैरवापर'

अहमदनगर : केंद्रीय मंत्री नारायण राणे यांना पोलिसांनी दिलेली वागणूक आणि त्यांना झालेली अटक याबाबत संगमनेर भाजपकडून राज्यातील महाविकास आघाडी सरकारचा तीव्र शब्दात निषेध करण्यात आला आहे. यावेळी भारतीय जनता पार्टीचे संगमनेर शहराध्यक्ष

श्रीराम गणपुले , संजय वाकचौरे , शिंदे सतीश , शैलेश फटांगरे यांच्यासह भाजप कार्यकर्त्यांनी महाविकास आघाडी सरकार विरोधात जोरदार घोषणाबाजी केली. काल केंद्रीय कॅबिनेट मंत्री नारायण राणे यांना पोलिसांनी अटक केल्यानंतर त्यांना ज्या पद्धतीने वागणूक दिली त्याबद्दल पोलिसांचा देखील भारतीय जनता पार्टीच्या वतीने निषेध करण्यात आला.

सत्ताधाऱ्यांनी पोलीस यंत्रणेचा गैरवापर करत दबावतंत्र वापरून केंद्रीय मंत्र्यांना अटक केली तसेच स्थानिक सोनिया सेनेचे कार्यकर्ते हिंदुत्ववादी कार्यकर्त्यांना पोलिसांकडे दबाव आणण्यासाठी बोलावतात असं भाजप कार्यकर्त्यांनी म्हटले आहे.

'सोनिया सेनेचे एजंट म्हणून वागणाऱ्या पोलिसांना समज द्यावी,अशा प्रकारे वर्तन थांबले नाही तर तीव्र आंदोलन करण्यात येईल' अशा आशयाचे निवेदन यावेळी भाजपच्या वतीने प्रशासनाला देण्यात आले.