संभाजी ब्रिगेडचे मुंबई उपाध्यक्ष सुदाम साहिल यांचा शेकडो कार्यकर्त्यांसह छत्रपती संभाजी ब्रिगेडमध्ये प्रवेश
संभाजी ब्रिगेडला मुंबईत मोठा राजकीय व संघटनात्मक धक्का बसला आहे. संभाजी ब्रिगेडचे मुंबई उपाध्यक्ष सुदाम साहिल यांनी आपल्या सहकारी पदाधिकारी रोशन कांबळे यांच्यासह शेकडो कार्यकर्त्यांसोबत छत्रपती संभाजी ब्रिगेड मध्ये जाहीर प्रवेश केला आहे. शिवजयंतीच्या शुभ मुहूर्तावर तसेच रमजानच्या पहिल्या दिवशी मुस्लिम बांधवांसाठी इफ्तार पार्टी आयोजित करून हा प्रवेश सोहळा पार पडला.
यावेळी बोलताना सुदाम साहिल म्हणाले, “२०१९ पासून मी संभाजी ब्रिगेडमध्ये चळवळीचा कार्यकर्ता म्हणून कार्यरत होतो. उत्तर मुंबईतील पहिली शाखा सुरू करण्याचा मान मला मिळाला. त्यानंतर अजून तीन शाखा उभारून संघटना मजबूत केली. मात्र ऐन निवडणुकीच्या काळात मुंबई अध्यक्ष सुहास लांडे यांनी आमच्यावर अन्याय केला. मराठी कार्यकर्त्यांना डावलून उत्तर भारतीय उमेदवाराला तिकीट देण्यात आले.अशा संघटनेत राहण्याचा काही अर्थ उरला नसल्याचं त्यांनी सांगितले.
सुदाम साहिल यांनी पुढे सांगितले की, “आजवर आम्ही संभाजी ब्रिगेडसाठी आंदोलने केली, तुरुंगवास भोगला, अनेक गुन्हे अंगावर घेतले. मात्र शेवटी मराठी कार्यकर्त्यांनाच लाथ मारण्यात आली. त्यामुळे नाईलाजाने आम्ही संभाजी ब्रिगेड सोडण्याचा निर्णय घेतला.
यावेळी त्यांच्यासह मच्छिंद्र गोडके, मिलिंद कदम, पूनम पाटील अशा अनेक कार्यकर्त्यांनीही संभाजी ब्रिगेडचा राजीनामा दिला असून लवकरच छत्रपती संभाजी ब्रिगेडमध्ये प्रवेश करणार असल्याचा दावा करण्यात आला आहे.
