संसदेच्या दोन्ही सभागृहात इंधन दरवाढीवरुन गदारोळ, कामकाज स्थगित

संसदेच्या अर्थसंकल्पीय अधिवेशनाच्या दुसऱ्या टप्प्याला सुरूवात झाली आहे. पण गेल्या दोन दिवसांपासून संसदेच्या दोन्ही सभागृहात विरोधकांनी इंधन दरवाढीवरुन सरकारला घेरत चर्चेची मागणी केली आहे. मंगळवारीही राज्यसभेचे कामकाज दोनवेळा तहकूब करण्यात आले तर लोकसभाही गदारोळामुळे तहकूब करण्यात आली. दुपारी दोन वाजेपर्यंत दोन्ही सभागृहांचे कामकाज स्थगित करण्यात आले.

गेल्या काही दिवसांपासून इंधनाचे दर वाढत चालले आहेत. काही ठिकाणी तर पेट्रोल १०० रुपयांच्या वर गेले आहे. त्यामुळे देशभरात संतापाची लाट असताना विरोधकांनी या मुद्द्यावर चर्चेची मागणी केली आहे. मात्र सरकारने सध्या तरी या विषयावर चर्चेची तयारी दाखवली नाहीये. दरम्यान सरकार इंधन दरवाढीच्या चर्चेपासून पळ का काढतंय असा सवाल विरोधकांनी उपस्थित केला आहे.