पुण्यातील पर्यटनस्थळांवर गर्दी, कडक कारवाईचे अजित पवारांचे आदेश

पुणे जिल्ह्यातील पर्यटन स्थळांवर मोठ्या प्रमाणात गर्दी होत आहे. त्यामुळे कोरोना संसर्ग वाढत असल्याने अशा ठिकाणी कोरोनाबाबच्या निर्बंधांची कडक अंमलबजावणी करावी, कोणत्याही परिस्थितीत नियमांचे पालन झालेच पाहिजे, असे आदेश पालकमंत्री अजित पवार यांनी दिले आहेत. पुणे विभागीय आयुक्त कार्यालयात शुक्रवारी उपमुख्यमंत्री अजित पवार यांच्या अध्यक्षतेखाली जिल्ह्यातील कोरोना परिस्थिती व उपाययोजनांबाबत आढावा बैठक घेण्यात आली.

कोरोना संसर्ग संपूर्णपणे रोखण्यासाठी कोरोना प्रतिबंधक नियमांची कडक अंमलबजावणी झाली पाहिजे. नियम न पाळणाऱ्यांमवर कडक कारवाई करावी. त्यामुळे प्रशासकीय यंत्रणांनी नियमभंग करणाऱ्यांीविरुद्ध अधिक कडकपणे कारवाई करावी असे अजित पवार यांनी सांगितले आहे. . सार्वजनिक ठिकाणी गर्दी होणार नाही याबाबतची दक्षता घेण्यासोबतच मास्कचा वापर, सुरक्षित अंतर व इतर दक्षता नियमांचे काटेकोर पालन करावे, असे आवाहनही त्यांनी केले.

पुणे जिल्ह्याने कोविड लसीकरणाचा पन्नास लाखाचा टप्पा पार केला. पण कोरोनाचा प्रसार रोखण्यासाठी कुठल्याही परिस्थितीत नियमांचे पालन झालेच पाहिजे. निष्कारण घराबाहेर पडणाऱ्याि व्यक्ती, मास्क न वापरणारे, सुरक्षित अंतराचे पालन न करणारे यांच्यावर कारवाई झालीच पाहिजे, असे सांगत या कारवाईत खंड पडायला नको असेही अजित पवार यांनी सांगितले आहे. पोलीस आणि प्रशासनाने कुठेही गर्दी होणार नाही आणि लोकांमध्ये सुरक्षित अंतर राहील याची खबरदारी घेण्याचे आदेशही त्यांनी दिले आहेत.