तथाकथित भविष्यकार अशोक खरातला अत्याचारप्रकरणी पोलिसांनी ठोकल्या बेड्या

तथाकथित राजकीय भविष्यकार, अंकशास्त्रज्ञ म्हणून राजकीय वर्तुळात परिचित असलेल्या अशोक खरात ऊर्प कॅप्टन खरात याला नाशिक गुन्हे शाखेने मंगळवारी मध्यरात्री अटक केलीय. दरम्यान, या घटनेमुळं राजकीय क्षेत्रात खळबळ उडालीय.

सिन्नर तालुक्यातील श्री शिवनिका संस्थान ट्रस्टच्या माध्यमातून अशोक खरात हा सक्रिय आहे. या खरातचे अनेक बड्या राजकीय नेत्यांशी संबंध असल्याचे फोटो आणि व्हिडिओ व्हायरल झाले आहेत. एका ३५ वर्षीय महिलेवर अत्याचार केल्याच्या तक्रारीवरुन खरातच्या विरोधात नाशिकच्या सरकावाडा पोलीस ठाण्यात गुन्हा दाखल करण्यात आला आहे.

दरम्यान, पोलिसांना अशोक खरातच्या कार्यालयातून एक पेनड्राईव्ह सापडला आहे. यामध्ये अनेक बड्या राजकीय नेत्यांचे, वरिष्ठ अधिकारी, सेलिब्रेटटी आणि उद्योजक महिलांचे व्हिडिओ आणि फोटो असल्याची माहिती समोर येतेय. त्यादृष्टीनंही पोलिसांनी तपास सुरु केलाय.

अशोक खरात हा नेव्हीतून सेवानिवृत्त झाला आहे. त्यानंतर मागील काही वर्षात त्यानं स्वतःची ओळख ही भविष्यकार म्हणून निर्माण केली. त्यामुळं अनेक नेते आणि कलाकारांचा त्याच्या संस्थानाकडे राबता असायचा. मात्र, याच अशोक खरातवर आता बलात्काराचा गुन्हा दाखल झाल्यानं अनेकांच्या भुवया उंचावल्या आहेत.

पोलिस तपासावर माझा पूर्ण विश्वास - रुपाली चाकणकर

याच दरम्यान महाराष्ट्र राज्य महिला आयोगाच्या अध्यक्ष रुपाली चाकणकर यांचा आणि अशोक खरातचा फोटो व्हायरला झालाय. यावर चाकणकर यांनी खुलासाही केलाय. अशोक खरातच्या ट्रस्टच्या सामाजिक कामांच्या निमित्तानं अनेक जण ट्रस्टच्या कामाशी जोडले गेलो होतो. त्यामध्ये समाजातील अनेक प्रतिष्ठित व्यक्ती आहेत. अशोक खरात यांच्या वैयक्तिक आयुष्य किंवा त्यांच्यावरील आरोपांबाबत कल्पना नाही. त्यांच्यावरील आरोपांबाबत पोलीस निःपक्षपातीपणे चौकशी करतील, पोलिस तपासावर माझा पूर्ण विश्वास असल्याचं चाकणकर यांनी म्हटलंय. दरम्यान, या संपूर्ण प्रकरणाची सखोल चौकशी करुन खरातवर कडक कारवाई करण्याची मागणी अंधश्रद्धा निर्मूलन समितीनं केलीय.