मोदी-योगींचे फोटो कचऱ्यात, सफाई कर्मचारी बडतर्फ
पंतप्रधान नरेंद्र मोदी आणि उ.प्रदेशचे मुख्यमंत्री योगी आदित्यनाथ य़ांचे फोटो कचऱ्यात टाकल्याप्रकरणी सफाई कर्मचाऱ्याची हकालपट्टी करण्यात आली आहे. रविवारी सोशल मीडियावर एक व्हिडिओ व्हायरल झाला होता. यामध्ये मथुरेत पंतप्रधान नरेंद्र मोदी आणि योगी आदित्यनाथ यांचे फोटो कचऱ्याच्या गाडीतून नेले जात असल्याचे दिसत होते. रस्त्यावरुन कचरा घेऊन जाणाऱ्या त्या कर्मचाऱ्याला काही लोकांनी अडवून फोटो तपासले असता ते मोदी आणि योगी यांचे असल्याचे दिसले.
यानंतर मोदी आणि योगी यांचे ते फोटो काहींनी बाहेर काढले आणि जवळच असलेल्या एका नळावर धुतले. दरम्यान हा व्हिडिओ व्हायरल झाल्यानंतर मथुरा प्रशासनाने संबंधित सफाई कर्मचाऱ्याला कामावरुन काढून टाकले आहे. मथुरा महापालिकेचे अतिरिक्त आयुक्त सत्येंद्र तिवारी यांनी इंडिया टुडेला दिलेल्या माहितीनुसार संबंधित कर्मचारी हा कंत्राटावर कामाला होता. पण त्याने ते फोटो कचऱ्यात टाकण्याआधी का पाहिले नाही असा सवाल त्यांनी उपस्थित केला आहे.
मा. प्रधानमंत्री @narendramodi जी इस मामले में हस्तक्षेप करे! इन फोटो का विधीवत विसर्जन करने की SOP जारी करें। गरीब मजदूर की क्या गलती है इसमें ? @myogiadityanath https://t.co/WD8RvjpM8v
— Ravindra Ambekar (@RavindraAmbekar) July 17, 2022
दरम्यान सफाई कर्मचाऱ्याला काढून टाकल्याप्रकरणी आता सोशल मीडियावर विविध प्रतिक्रिया उमटू लागल्या आहेत. कचरा म्हणून फोटो फेकणाऱ्यांवर कारवाईऐवजी ते फोटो घेऊन जाणाऱ्या सफाई कर्मचाऱ्याला शिक्ष का, असा सवालही उपस्थित झाला आहे. मॅक्स महाराष्ट्रचे संपादक रवींद्र आंबेकर यांनी देखील यावर ट्विट करत अशा फोटोंची विल्हेवाट लावण्यासाठी एक प्रक्रिया तयार केली पाहिजे, त्या गरीब सफाई कर्मचाऱ्याची यात चूक नाही, असे मत व्यक्त केले आहे.
