Oracle Layoffs 2026 : Oracleचा महसूल वाढला, तरीही मोठी कर्मचारी कपात!

अमेरिकेतील दिग्गज आयटी कंपनी ओरेकलने(Oracle) जगभरात हजारो कर्मचाऱ्यांची कपात केली आहे. विशेष म्हणजे कंपनीचा महसूल सातत्याने वाढत असतानाही हा धक्कादायक निर्णय घेण्यात आला आहे. आर्टिफिशियल इंटेलिजन्स (AI) इन्फ्रास्ट्रक्चर आणि मोठ्या डेटा सेंटर प्रकल्पांवरील वाढत्या खर्चामुळे कंपनीच्या रोख रकमेवर (Cash Flow) मोठा ताण आला असून, तो कमी करण्यासाठी ही टाळेबंदी करण्यात आल्याचे समजते.

मंगळवारी ओरेकलने भारतातील सुमारे २,५०० कर्मचाऱ्यांना कामावरून काढून टाकले आहे. येत्या एका महिन्यात कपातीची आणखी एक लाट येण्याची शक्यता आहे. जागतिक स्तरावर विचार केला तर ओरेकलने आतापर्यंत एकूण ३०,००० पदे रद्द केली आहेत.

एका ईमेलद्वारे दिली निरोप: "आज तुमचा शेवटचा दिवस"

मंगळवारी सकाळपासूनच कर्मचाऱ्यांना नोकरी संपुष्टात आणल्याचे ईमेल येण्यास सुरुवात झाली. 'बिझनेस इनसाइडर'ने पाहिलेल्या नोटिफिकेशन ईमेलनुसार, कंपनीने म्हटले आहे की, "ओरेकलच्या सध्याच्या व्यावसायिक गरजांचा विचार करून, संघटनात्मक बदलाचा भाग म्हणून तुमची भूमिका (Role) रद्द करण्याचा निर्णय घेण्यात आला आहे. परिणामी, आजचा दिवस तुमचा शेवटचा कामकाजाचा दिवस असेल." कामावरून कमी केलेल्या कर्मचाऱ्यांना कंपनीच्या नियमांनुसार 'सेव्हरन्स पॅकेज' दिले जाणार आहे.

एआय (AI) वरील खर्च ठरतोय कपातीचे कारण

ओरेकल सध्या एआय आणि क्लाउड इन्फ्रास्ट्रक्चरचा विस्तार करण्यासाठी आक्रमक पावले उचलत आहे. OpenAI सारख्या दिग्गज क्लायंटसाठी डेटा सेंटर्स उभारण्यासाठी कंपनी अब्जावधी डॉलर्सची गुंतवणूक करत आहे.

ऐतिहासिक करार

OpenAI ने ओरेकलसोबत पुढील ५ वर्षांसाठी सुमारे ३०० अब्ज डॉलर्सचा कॉम्प्युटिंग पॉवर खरेदीचा करार केला आहे. हा तंत्रज्ञान क्षेत्रातील इतिहासातील सर्वात मोठ्या करारांपैकी एक आहे.

भांडवली खर्चात मोठी वाढ:

फेब्रुवारी २०२६ ला संपलेल्या चार तिमाहींमध्ये कंपनीने भांडवली खर्चावर (Capex) ४८.२५ अब्ज डॉलर्स खर्च केले, तर कंपनीचा ऑपरेटिंग कॅश फ्लो केवळ २३.५ अब्ज डॉलर्स होता. यामुळे कंपनीचा 'फ्री कॅश फ्लो' उणे २४.७ अब्ज डॉलर्सवर पोहोचला आहे.

महसूल मजबूत, पण रोख रकमेवर ताण

खर्चाचा ताण असला तरी ओरेकलची व्यावसायिक कामगिरी उत्तम राहिली आहे.

* आर्थिक वर्ष २०२६ च्या तिसऱ्या तिमाहीत कंपनीचा महसूल २२ टक्क्यांनी वाढून १७.२ अब्ज डॉलर्स झाला आहे.

* क्लाउड महसुलात ४४ टक्क्यांची मोठी वाढ होऊन तो ८.९ अब्ज डॉलर्सवर पोहोचला आहे.

* भविष्यातील महसुलाचे संकेत देणारे 'रिमेनिंग परफॉर्मन्स ऑब्लिगेशन्स' (RPO) ३२५ टक्क्यांनी वाढून ५५३ अब्ज डॉलर्स झाले आहेत.

कर्जाचा वाढता डोंगर आणि गुंतवणूकदारांची चिंता

महसूल वाढत असला तरी, ओरेकलवरील वाढत्या कर्जामुळे गुंतवणूकदार चिंतेत आहेत. ब्लूमबर्गच्या अहवालानुसार, कंपनीच्या कर्जाचा विमा उतरवण्याचा खर्च (Credit Default Swap - CDS) विक्रमी पातळीवर पोहोचला आहे. वॉल स्ट्रीटवर ओरेकलकडे सध्या 'एआय-संबंधित क्रेडिट रिस्क'चे मुख्य निदर्शक म्हणून पाहिले जात आहे.

जेपी मॉर्गनच्या विश्लेषकांनी म्हटले आहे की गुंतवणूकदारांचे लक्ष आता फक्त महसुलावर नसून, ओरेकल ही एआयमधील गुंतवणूक शाश्वत कमाईत कधी रूपांतरित करते, याकडे लागले आहे.

तंत्रज्ञान क्षेत्राचा बदलता चेहरा

अॅमेझॉन आणि मायक्रोसॉफ्ट सारख्या स्पर्धकांशी दोन हात करण्यासाठी ओरेकल 'स्टारगेट एआय' (Stargate AI) सारख्या महत्त्वाकांक्षी प्रकल्पांवर काम करत आहे. मात्र, या मोठ्या गुंतवणुकीसाठी खर्च कपात करणे आवश्यक बनले आहे. गेल्या वर्षभरात अनेक तंत्रज्ञान कंपन्यांनी एआयवरील खर्च वाढवण्यासाठी कर्मचाऱ्यांच्या संख्येत कपात करण्याचे धोरण स्वीकारले आहे. ओरेकलसाठी हा टप्पा एआय क्षेत्रातील दीर्घकालीन पैज मानला जात आहे, ज्याचे फळ मिळण्यास काही वर्षे लागू शकतात.