चिंता वाढली, देशाची कोरोना रुग्णसंख्या लाखापार

मुंबई- देशात कोरोना रुग्णांच्या संख्येत मोठ्या प्रमाणावर वाढ होत आहे. गेल्या 24 तासात देशात 1 लाख 17 हजार 100 नव्या कोरोना रुग्णांची नोंद झाली आहे. ओमायक्रॉन (omicron ) व्हेरियंटच्या पार्श्वभुमीवर देशात कोरोना रुग्णसंख्या झपाट्याने वाढत आहे. तर गेल्या 24 तासात देशातील कोरोना रुग्णांची संख्या वाढून सक्रीय रुग्णांची संख्या 3 लाख 71 हजार 363 इतकी झाली आहे. पण दिलासादायक बाब म्हणजे 30 हजार 836 रुग्ण कोरोनामुक्त झाले आहेत. याबरोबरच २४ तासात 302 रुग्णांच्या मृत्यूची नोंद झाली आहे.

देशातील ओमायक्रॉन रुग्णांची संख्या 3 हजार 7 इतकी झाली आहे. त्यापैकी 876 रुग्ण महाराष्ट्रातील तर 465 रुग्ण दिल्लीत आढळले आहेत. देशातील एकूण ओमिक्रॉन रुग्णांपैकी 1 हजार 199 रुग्ण ओमिक्रॉनमुक्त झाले आहेत. मात्र देशात ओमिक्रॉनच्या दुसऱ्या रुग्णाच्या मृत्यूची नोंद झाली आहे. ओडिशातील बोलांगीर येथील 55 वर्षीय महिलेचा ओमिक्रॉनमुळे मृत्यू झाल्याचे समोर आले आहे. तर यापुर्वी राजस्थानमधील उदयपुर येथील 73 वर्षीय वृध्दाचा ओमिक्रॉन या व्हेरियंटमुळे मृत्यू झाला होता. परंतू या दोन्हीही व्यक्तींनी परदेशवारी केली नव्हती.

बुधवारी कोरोना रुग्णांच्या संख्येत जवळपास दुपटीने वाढ झाली होती. मात्र त्यातुलनेत गेल्या 24 तासात कोरोना रुग्णांच्या संख्येत 27 हजार इतकी वाढ झाली आहे. तर आतापर्यंत देशभरात 3 कोटी 52 लाख 26 हजार 386 कोरोना रुग्णांची नोंद झाली आहे. त्यापैकी 3 कोटी 43 लाख 71 हजार 845 रुग्ण कोरोनामुक्त झाले आहेत.