पद्मश्री डॉ. विठ्ठलराव विखे पाटीलकलागौरव पुरस्काराने नंदेश उमप यांचा गौरव
अहमदनगर : सहकार चळवळीचे जनक पद्मश्री डॉ. विठ्ठलराव विखे पाटील यांच्या 120 व्या जयंती निमित्त 2019 च्या राज्यस्तरीय साहित्य पुरस्कारांची घोषणा पुरस्कार निवड समितीने केली होती. त्यानुसार ज्येष्ठ साहित्यिक व समिक्षक डॉ. रमेश धोंगडे यांना पद्मश्री डॉ. विठ्ठलराव विखे पाटील साहित्य सेवा जीवनगौरव पुरस्कार देऊन गौरविण्यात आले. तर पद्मश्री डॉ.विठ्ठलराव विखे पाटील कलागौरव पुरस्काराने मुंबई येथील नंदेश उमप यांचा गौरव करण्यात आला. कोरोना संकटामुळे 2019 च्या पुरस्कारांचे वितरण गेल्या वर्षी होऊ शकले नव्हते. या पुरस्काराची 30 वर्षांची परंपरा आहे.
माजी मंत्री आ. राधाकृष्ण विखे पाटील व पुरस्कार निवड समितीचे अध्यक्ष ज्येष्ठ विचारवंत डॉ. रावसाहेब कसबे यांच्या उपस्थितीत कोरोना नियमावलींचे पालन करून छोटेखानी समारंभात या पुरस्कारांचे वितरण करण्यात आले.साहित्य संमेलनाच्या अध्यक्षांसह राज्यातील इतर मान्यवरांची यावेळी उपस्थिती होती.
उमप हे आजच्या पिढीतील उत्कृष्ट लोककलाकार म्हणून परिचित आहेत.त्यांनी केलेल्या कार्यामुळे वर्तमानात आणि भविष्यात लोककला जपली जाणार आहे. त्यांच्या याच कार्याची दखल घेऊन त्यांना हा पुरस्कार देऊन गौरविण्यात आले.
