#MumbaiRape : तपासासाठी ज्योत्स्ना रासम यांच्या नेतृत्वाखाली SIT

मुंबईतील साकीनाका येथे झालेल्या बलात्कार प्रकरणी राज्य सरकारने आता SITची स्थापना केली आहे. या विशेष पथकाच्या प्रमुखपदी एसीपी ज्योत्सा रासम यांची नियुक्ती करण्यात आली आहे. मुंबई पोलिसांनी याची माहिती दिली आहे. " लवकरात लवकर न्याय सुनिश्चित करण्यासाठी वचनबद्ध! साकीनाका येथे ३४ वर्षीय महिलेवर झालेल्या गंभीर गुन्ह्याचा तपास एका महिन्याच्या आत पूर्ण करण्याच्या उद्देशाने, महिला सहाय्यक पोलीस आयुक्त ज्योत्स्ना रासम यांच्या नेतृत्वाखाली विशेष तपास पथकाची नेमणूक करण्यात आली आहे." या प्रकरणाचा तपास सक्षम महिला पोलीस अधिकाऱ्याकडे दिला जावा अशी मागणी होत होती.

दरम्यान या प्रकरणातील आरोपी मोहन चौहान याला कोर्टात हजर करण्यात आले. त्याला वांद्र्याच्या सुट्टीकालीन कोर्टाने 10 दिवसांची पोलीस कोठडी सुनावली आहे. या प्रकरणाचा खटला फास्ट ट्रॅक कोर्टात चालवला जावा अशी मागणी विरोधकांनी केली आहे. तर गृहमंत्री दिलीप वळसे पाटील यांनीही या प्रकरणात आरोपींना कठोरात कठोर शिक्षा होईल यासाठी सरकारचे प्रयत्न राहतील असे सांगितले आहे.