मुंबईच्या महापौरांना धमकीचे पत्र, अश्लील भाषेमुळे महापौरांच्या डोळ्यात अश्रू

एकीकडे मुंबईच्या महापौर किशोरी पेडणेवर विरुद्ध आशीष शेलार यांच्यातील संघर्ष आता कोर्टात पोहोचला आहे. तर दुसरीकडे महापौर किशोरी पेडणेकर यांना धमकीचे पत्र आल्याने खळबळ उडाली आहे. याबाबत महापौर किशोरी पेडणेकर यांनी पत्रकार परिषद घेऊन माहिती दिली. पण यावेळी या पत्रातील भाषा अत्यंत अश्लील असल्याचे सांगत असताना महापौर पेडणेकर यांना अश्रू अनावर झाले. आपल्याला काहीही झाले तरी चालेल पण आपल्या कुटुंबाला धक्का लावण्याचा प्रयत्न केला तर सहन करणार नाही असा इशाराही महापौरांनी यावेळी दिला. तसेच या पत्राबाबत राज्य महिला आयोगाकडे तक्रार करणार असल्याचेही त्यांनी यावेळी सांगितले.

तुमच्या कुटुंबातल्या प्रत्येकाला मारून टाकू, तुम्हाला मारू, तुमच्या अवयवांची विटंबना करू असे या पत्रात लिहिले असल्याचे महापौरांनी सांगितले. तसेच राजकीय आरोपांची पातळी किती खाली आली आहे, हे यावरुन दिसते, असे महापौरांनी यावेळी सांगितले. पत्र पाठवणाऱ्याचं नाव विजेंद्र म्हात्रे लिहिले आहे, पत्ता उरणचा आहे तर पोस्टाचा शिक्का पनवेल इथला आहे आणि पत्रावरील पत्ता आपल्या जुन्या घराचा आहे, अशी माहिती महापौरांनी दिले तसेच संभ्रम निर्माण करणारे हे पत्र असले त्यातील भाषा ही संभ्रम निर्माण करणारी नाही तर हीन आहे, अशी भाषा वापरून कट करण्याचा प्रयत्न केला जात आहे, आपल्या कुटुंबाला धक्का लावण्याचा प्रयत्न केला तर सहन करणार नाही असा इशाराही महापौरांनी दिला आहे.