सांगली जिल्हा बँकेच्या अध्यक्षपदी आमदार मानसिंगराव नाईक तर उपाध्यक्षपदी जयश्रीताई मदन पाटील यांची बिनविरोध निवड
सांगली : सांगली जिल्हा मध्यवर्ती सहकारी बँकेच्या अध्यक्षपदी शिराळ्याचे आमदार मानसिंगराव नाईक तर उपाध्यक्षपदी श्रीमती जयश्रीताई मदन पाटील यांची बिनविरोध निवड झाली आहे. जयश्री मदन पाटील यांची उपाध्यक्षपदी निवड झाल्याने पहिल्यांदाच महिला संचालकांना हा बहुमान मिळाला आहे.
त्यांच्या निवडीनंतर समर्थकांनी फटाक्यांची आतषबाजी करत ढोल-ताशांच्या गजरात आनंदोत्सव साजरा केला. यावेळी नूतन अध्यक्ष आणि उपाध्यक्षांचा सत्कार करण्यासाठी जिल्हा बँकेचा परिसर गजबजून गेला होता.
जयश्री पाटील या दिवंगत माजी मंत्री मदनभाऊ पाटील यांच्या पत्नी, तर महाराष्ट्राचे माजी मुख्यमंत्री वसंतदादा पाटील यांच्या नातसून आहेत.
सांगली जिल्हा बँकेसाठी 21 नोव्हेंबरला मतदान होऊन 23 नोव्हेंबरला मतमोजणी झाली होती. ज्यात राष्ट्रवादी, कॉंग्रेस आणि शिवसेना यांच्या महाआघाडीच्या सहकार पॅनेलने 17 तर भाजप प्रणित शेतकरी विकास पॅनेलने 4 जागांवर विजय मिळवला आहे.
महाआघाडीची सत्ता आल्यानंतर अध्यक्ष आणि उपाध्यक्षपदाबाबत उत्सुकता होती. अध्यक्षपदावर आमदार मानसिंगराव नाईक यांचा प्रबळ दावा होता. त्यामुळे त्यांची निवड ही निश्चितच होती. तर उपाध्यक्षपदी कॉंग्रेसच्या श्रीमती जयश्री पाटील यांचेच नाव चर्चेत होते.
पतंगराव कदमांनंतर जयश्री पाटलांचं मोठं काम
काँग्रेस नेते डॉ. पतंगराव कदम, मदन पाटील यांच्या पश्चात शहरात काँग्रेसला बळ देण्याचे काम जयश्री पाटील यांनी केले. लोकसभा, विधानसभा, महापालिका निवडणुकीसह पक्षाच्या विविध पातळीवर कार्यक्रम, आंदोलनात त्या सहभागी असत. गेल्या महापालिका निवडणुकीतही काँग्रेस-राष्ट्रवादी आघाडी स्थापनेपासून ते निवडणूक प्रचारातही त्यांनी आघाडी सांभाळली होती. परंतु, त्या तुलनेत काँग्रेसमधून त्यांना व कार्यकर्त्यांना न्याय दिला जात नाही, अशी खदखद त्यांच्या मनात होती.
