Missing you a lot Dad, जय पवार वडिलांच्या आठवणीत भावूक !
Jay Pawar's Emotional Post Shares to Father Ajit Pawar अजित पवार यांच्या अकाली निधनानंतर संपूर्ण महाराष्ट्र सुन्न झाला. प्रत्येकाने आपल्या भावना वेगवेगळ्या पद्धतीने व्यक्त केल्या. कुणी अजितदादांसोबतच्या आठवणींना सोशल मीडियावर शब्दबद्ध केलं तर कुणी माध्यमांसमोर टाहो फोडत आपल्या कामाचा माणूस गेल्याच्या भावना व्यक्त केल्या. प्रत्येक घरा-घरात हळहळ व्यक्त होत होती. अजित पवार या व्यक्तिमत्वाने सर्वसामान्यांपासून ते राजकारणातील सत्ताधारी, विरोधकांना आपल्या कामाने आपलस केलं होतं. आठवड्याभरापूर्वी अचानक गेलेल्या अजितदादांच्या आठवणीत त्यांचा धाकटा मुलगा जय पवार यांनी सोमवारी ( २ फेब्रुवारी २०२६ ) रात्री उशीरा एक्सवर आपल्या वडिलांसोबतचा फोटो शेअर केला आहे.
या फोटोत जय यांनी आपल्या वडिलांना घट्ट मिठी मारली आहे आणि वर लिहिलं आहे की, डॅड काश, वेळ थांबली असती… मी तुम्हाला घट्ट मिठीत घेऊन आयुष्यभर तसाच राहिलो असतो. असं लिहून रेड हार्टचा इमोजी दिला आहे.
तर मंगळवारी (३ फेब्रुवारी २०२६) पुन्हा एकदा जय पवार यांनी आपल्या वडिलांचा सारख्या पोझिशन मधला फोटो शेअर करत Missing you a lot Dad #बाबा असं कॅप्शन दिलं आहे.
या पोस्टवर अनेक नेटिझन्सने भावनिक प्रतिक्रिया त्यांच्या कमेंट बॉक्समध्ये केल्या आहेत. दरम्यान, आपण जर पाहिलं तर जेव्हा अजित पवार यांचे पार्थिव शरीर रुग्णालयाच्या बाहेर आणलं गेलं तेव्हा पासून जय पवार हे त्यांच्या सोबतच होते. अंत्यविधी कार्यक्रमातही जय पवार अतिशय भावनिक झाल्याचं चित्र आपण माध्यमांवर पाहिलं. बाप लेकाचं नातं हे खूप जिव्हाळ्याचं असतं. वडिलांच्या जाण्यानं जय पवार, पार्थ पवार यांच्या आयुष्यात कधी न भरून निघणारी पोकळी निर्माण झाली आहे. त्यांच्या आठवणीत गहिवरलेल्या जय पवार यांनी पहिल्यांदाच सोशल मीडियावर आपल्या भावना व्यक्त केल्या.
