मराठी तमाशा लोककलावंत परिषदेचा १५ डिसेंबरला कराड तीव्र आंदोलनाचा इशारा

नारायणगाव : लोककला असणाऱ्या तमाशा मंडळांना महाराष्ट्र शासनाच्या मदत पुनर्वसन खात्याने खुल्या मैदानावर कार्यक्रम करण्याची परवानगी दिली असतानाही पोलीस प्रशासन मात्र, तमाशा कार्यक्रमांना परवानगी नाकारत आहे. तर दुसरीकडे राजकीय मेळावे, सभा, नाट्यगृहातील कार्यक्रम, मिरवणूका सर्रास सुरू आहेत, त्यामुळे असा दुजाभाव का? असं म्हणत १५ डिसेंबरला कराड येथे यशवंतराव चव्हाण यांच्या समाधी ठिकाणावर तीव्र आंदोलन करण्याचा इशारा मराठी तमाशा लोककलावंत परिषदेच्या वतीने देण्यात आला आहे.

मराठी तमाशा लोककलावंत परिषदेचे अध्यक्ष संभाजीराजे जाधव यांनी दिलेल्या निवेदनात म्हटले आहे की,गेली दोन वर्षे गावगाड्यातील लोक कलावंत उपाशी आहे. आपली उपजीविका काहीतरी मोलमजुरी करून करत आहे. त्यात आता कोरोनाचा प्रादुर्भाव काहीसा कमी झाल्याने महाराष्ट्र शासनाने मदत पुनर्वसन खात्याने लोकनाट्य तमाशा मंडळाचा कार्यक्रम करण्याची परवानगी दिली. मात्र त्या परिपत्रकामुळे राज्यातील पोलीस प्रशासन तमाशा परवानगी देत नाही. या संदर्भात पोलीस महासंचालक यांच्या कार्यालयाने ३० ऑक्टोबरला लोकनाट्य तमाशा कार्यक्रमाना परवानगी देण्याबाबत एक पत्रक काढले आहे. त्यानुसार सर्व पोलीस अधीक्षक, पोलीस आयुक्त यांना कळविण्यात आले असतानाही पोलीस विभाग कार्यक्रमांना परवानगी नाकारत आहेअसा आरोप करण्यात आला आहे.

दरम्यान , या प्रश्नी राज्याचे गृहमंत्री दिलीप वळसे पाटील यांची भेट घेऊन निवेदन देण्यात आले. त्यांनी पोलीस महासंचालकांना परवानगी देण्याबाबत सूचना दिल्यात. मात्र, सांगली, सातारा, कोल्हापूर, खान्देश, विदर्भ, मराठवाडा, नाशिक जिल्ह्यांत तमाशा फड मालकांना कार्यक्रम करण्यास पोलीस प्रशासन परवानगी देत नाहीत आणि परवानगीसाठी दिलेल्या अर्जाची पोहच देत नाहीत, हा अजब कारभार पोलीस खात्याचा सुरू असल्याचे निवेदनात म्हटले आहे.