किर्तन सुरू असतांना किर्तनकारांचे निधन ; जामदे गावातील घटना

नंदुरबार : नंदुरबार जिल्ह्याच्या वेशीवर वसेलेल्या जामदे गावात किर्तनाच्या व्यासपीठावर ताजुद्दिन महाराज शेख यांनी अखेरचा श्वास घेतला आहे. जामदे गावात गेल्या आठवड्यापासुन ज्ञानेश्वरी पारायण सप्ताह सुरु होता. सकाळी ज्ञानेश्वरी पारायणानंतर रोज रात्री वेगवेगळ्या किर्तनकारांचे किर्तन होत होते. दरम्यान सोमवारी रात्री ताजुद्दिन महाराज शेख यांचे किर्तन सुरु असतांनाच ते अचानक छातीत कळ आल्याने खाली बसले. यावेळी ग्रामस्थांनी त्यांच्यासाठी पाण्याची देखील व्यवस्था केली. मात्र जोपर्यंत त्यांना डॉक्टरांकडे हलवण्यात आले.

तो पर्यंत त्यांची प्राणज्योत मालावली असल्याचे डॉक्टरांनी सांगितले. एका नामवंत किर्तनकारांचा किर्तनाच्या व्यासपीठावर झालेला शेवट खऱ्या अर्थाने सर्वांना चटका लावून जाणार ठरत आहे. ताजुद्दिन महाराज हे मुस्लीम समाजाचे असले तरी वारकरी संप्रदायाची जीवनशैली त्यांनी अंगिकारली होती. ते मूळचे जालना जिल्ह्यातील घनसावंगी तालुक्यातील जांब समर्थजवळील बोधलापुरी येथील रहिवाशी होते.गावासह पैठणमध्येही त्यांनी एक आश्रम काढून त्यातून वारकरी सांप्रदायाचा प्रसार-प्रचाराचे काम ते करत होते. त्यांच्या निधनाने अनेकांनी शोक व्यक्त केला आहे.