Bhima Koreagaon: दंगल चौकशी प्रकरणी रश्मी शुक्लांची आयोगापुढे हजेरी

जागेचा प्रश्न सुटल्यानंतर भीमा कोरेगाव दंगलप्रकरणी पुण्याच्या तत्कालीन पोलीस आयुक्त रश्मी शुक्ला यांची भीमा कोरेगाव चौकशी आयोगापुढं दोन दिवस साक्ष नोंदणी सुरु झाली आहे. आज पहिल्या दिवशी त्यांनी आयोगापुढं हजेरी लावूनही काही आवश्यक कागदपत्रे उपलब्ध नसल्यानं त्यांची साक्ष नोंदवण्यात आली नाही. दरम्यान, पुढील तारीख अद्याप निश्चित झालेली नाही, अशी माहिती विशेष सरकारी वकील शिषिर हिरे यांनी दिली.

पुरेशी जागा नसल्यानं काही दिवसापूर्वी न्या.पटेल आयोगांनं सुनावण्या स्थगित करण्याचा निर्णय घोषीत केला होता. राज्य सरकारने त्यांना सह्याद्री अतिथीगृहात सुनावण्यासाठी जागा दिली. मुंबईत सह्याद्री गेस्ट हाऊसमध्ये आज आणि उद्या रश्मी शुक्ला यांची साक्ष नोंदविली जाणार होती. सन २०१८ मध्ये झालेल्या दंगलीत झालेल्या हिंसाचारानंतर राज्य सरकारने या प्रकरणी कोलकाता हायकोर्टाचे निवृत्त मुख्य न्यायाधीश जे. एन. पटेल यांच्या अध्यक्षतेखालील आणि महाराष्ट्राचे माजी मुख्य सचिव सुमित मलिक यांच्या नेतृत्वाखालील चौकशी आयोग नेमला आहे. या आयोगाकडून सध्या शुक्ला यांची साक्ष नोंदवली जात आहे.

मुंबईचे माजी पोलीस आयुक्त परमबीर सिंग यांनाही समन्स बजावण्यात आले होते, परंतू ते हजर झाले नाहीत. त्यावेळी सिंग हे अतिरिक्त पोलीस महासंचालक (कायदा व सुव्यवस्था) या पदावर होते. शुक्ला यांनी आयोगासमोर हजेरी लावली. तसेच शपथपत्र दाखल करण्यासाठी वेळ मागितला. या कार्यक्रमाबाबत पुणे पोलिसांकडून काही कागदपत्रे मिळणे बाकी असल्याचं यावेळी त्यांनी आयोगापुढं सांगितलं.