जगातील सर्वात उंच रेडिओ केंद्रांपैकी एका हाय पॉवर ट्रान्समीटरचे उद्घाटन

नवी दिल्ली : केंद्रीय माहिती आणि प्रसारण मंत्री अनुराग ठाकूर यांनी कारगिल लडाख येथील हंबट्टिंगलामध्ये जगातील सर्वात उंच रेडिओ केंद्रांपैकी एका हाय पॉवर ट्रान्समीटरचे उद्घाटन केले. समुद्र सपाटीपासून 13 हजार 300 फूट उंचीवर ऑल इंडिया रेडिओ एफएम रेडिओ स्टेशन आणि दूरदर्शनच्या दोन 10kW उच्च पॉवर ट्रान्समीटरचे उद्घाटन ठाकूर यांनी केले. या ट्रान्समीटरमुळे लेहमधील प्रसारण आणि एक्सेसमध्ये सुधारणा होणार आहे. सोबतच डोंगराळ भागातील लोकांना ऑल इंडिया रेडिओ आणि डीडीच्या चांगल्या दर्जाच्या सेवा मिळणार आहेत. नवीन ट्रान्समीटर हे विशेषत: लडाखच्या सीमावर्ती गावांमध्ये लोकांपर्यंत माहितीचा प्रसारासाठी उपयुक्त ठरणार आहे.

दरम्यान यावेळी बोलताना अनुराग ठाकूर म्हणाले की, ऑल इंडिया रेडिओ आणि डीडीच्या दोन ट्रान्समीटरची सेवा सुरू होणे ही मोठी गोष्ट आहे. नवीन ट्रान्समीटर शेजारील देशाच्या दुष्प्रचाराचा प्रतिकार करतील आणि योग्य माहिती लोकांपर्यंत पोहोचवतील.