हेअर स्टाईलिस्ट Jawed Habibअडचणीत, महिलेच्या डोक्यावर थुंकणं पडलं महागात
प्रसिद्ध हेअर स्टाईलिस्ट जावेद हबीब (Jawed Habib) अडचणीत आला आहे. एका महिलेची हेअर स्टाईल करताना तिच्या डोक्यावर जावेद हबीब थुंकल्याने आता तो चांगलाच वादात देखील अडकला आहे. त्याने केलेल्या या कृत्याचा व्हिडिओ सध्या सोशल मीडियावर व्हायरल झाला आहे. संबंधित महिलेने याबाबत पोलिसांत तक्रारदेखील दाखल केली आहे. सुरूवातीला पोलिसांनी आपली तक्रार घेतली नाही, पण अखेर आपण सीएम पोर्टलवर तक्रार केली, असे या पीडित महिलेने सांगितले आहे.
Never ever go to saloon of #JavedHabib, he is a thookiya. pic.twitter.com/ljIU1gCKBc
— Abhi (@Certified90sKid) January 6, 2022
राष्ट्रीय महिला आयोगानेही याची दखल घेतली आहे, तसेच उ.प्रदेश पोलिसांनी या प्रकरणी चौकशी कऱण्याचे आदेश दिले आहेत. उत्तर प्रदेशातील मुजफ्फरपूरमध्ये एका वर्कशॉप दरम्यान जावेद हबीबने हे कृत्य केले आहे. राष्ट्रीय महिला आयोगाच्या अध्यक्षा रेखा शर्मा यांनी या व्हायरल व्हिडिओबाबत चौकशी करुन तातडीने कारवाई करावी अशा सूचना राज्याच्या डीजीपींना केल्या आहेत. तसेच कारवाईचा अहवाल सादर करण्याचे आदेश दिले आहेत.
ज्या महिलेच्या डोक्यावर हबीब थुंकला होता, त्या महिलेनेही नेमके काय घडले ते सांगितले आहे. "आपण जावेद हबीब याचे वर्कशॉप अटेंड केले. त्याने मला हेअऱ स्टाईलसाठी स्टेजवर बोलावले. तो म्हटला की जर पाणी नसेल तुमची थुंकी वापरा. यापुढे मी रस्त्यावरील सलूनमध्ये जाईन पण हबीबकडे कधीही जाणार नाही,"असे या महिलेने म्हटले आहे. ही महिला स्वत: देखील एक ब्युटी पार्लर चालवते.
या घटनेनंतर काही हिंदुत्ववाद्यांनी या प्रकाराला धार्मिक रंग देण्याचा प्रयत्न केला आहे. दरम्यान जादेव हबीब यांनी या प्रकारानंतर माफी मागितली आहे. आमच्या व्यवसायात वर्कशॉप घेताना काहीवेळा गमतीजमती कराव्या लागतात, पण जर माझ्या कृत्यामुळे कुणी दुखावले असेल तर माफी मागतो, असे त्यांनी सांगितले.
