ग्रामपंचायत महासंग्रामासाठी राज्य निवडणूक आयोगाचा मोठा निर्णय

राज्यात ग्रामपंचायत निवडणुकीचा महासंग्रामाचे रणशिंग फुंकले असताना राखीव जागांवर ग्रामपंचायत निवडणूक लढवू इच्छिणाऱ्या उमेदवारांना जात वैधता प्रमाणपत्राऐवजी पडताळणी समितीकडे हे प्रमाणपत्र मिळविण्यासाठी केलेल्या अर्जाची सत्यप्रत अथवा पोचपावती किंवा अर्ज केल्याबाबतचा कोणताही पुरावा सादर करता येणार आहे त्यामुळे राज्यातील अनेक ग्रामपंचायत लढवू इच्छिणाऱ्या उमेदवारांना दिलासा मिळाला आहे.

राज्य निवडणूक आयोगाचे आयुक्त युपीएस मदान यांनी सांगितले की, राज्य निवडणूक आयोगाने 11 डिसेंबर 2020 रोजी जाहीर केलेल्या ग्रामपंचायतींच्या निवडणुकांसाठी 30 डिसेंबर 2020 पर्यंत नामनिर्देशनपत्र दाखल करण्याची अंतिम मुदत आहे. राखीव जागांवर निवडणूक लढविण्यासाठी नामनिर्देशपत्र दाखल करताना जात पडताळणी समितीकडे जात वैधता प्रमाणपत्रासाठी केलेल्या अर्जाबाबतचा पुरावा सादर करण्याबरोबरच एक हमीपत्रही देणे आवश्यक राहील. विजयी झाल्याच्या दिनांकापासून 12 महिन्यांच्या आत पडताळणी समितीने दिलेले जात वैधता प्रमाणपत्र सादर केले जाईल, असे या हमीपत्रात नमूद करावे लागेल.यामुळे ग्रामपंचायत लढवू इच्छिणाऱ्या अनेक उमेदवारांना दिलासा मिळणार आहे.