पंजाबी गायक सिद्धू मुसेवाला यांची हत्या गँगवॉरमधून?
पंजाबमधील प्रसिद्ध गायक सिद्धू मुसेवाला ( Sidhu Moose Wala)यांच्या हत्येनं देशभरात खळबळ उडाली आहे. मुसेवाला यांची सुरक्षा पंजाब सरकारने काढल्यानंतर दोनच दिवसात त्यांची हत्या करण्यात आल्याने पंजाब सरकारच्या निर्णयावर प्रश्नचिन्ह उपस्थित केले जात आहे. सिद्धू मुसेवाला यांची रविवारी पंजाबच्या मानसा जिल्ह्यात काही हल्लेखोरांनी हत्या केली. मुसेवाला हे आपल्या जवाहरके या आपल्या गावात असताना त्यांची हत्या करण्यात आली आहे. मुसेवाला यांची गोळ्या घालून हत्या करण्यात आली.
दरम्यान मुसेवाला यांच्या हत्येची जबाबदारी कुप्रसिद्ध गँगस्टर बोल्डी ब्रार (Goldy Brar)याने घेतल्याचे वृत्त काही माध्यमांनी दिले आहे. गोल्डी ब्रार याने फेसबुक पोस्टद्वारे या हत्येची जबाबदारी स्वीकारली आहे. गोल्डी ब्रार हा गँगस्टर सध्या कॅनडामध्ये राहतो आहे.
आपल्या फेसबुक पोस्टमध्ये गोल्डी ब्रार याने या हत्येचे कारण स्पष्ट केले आहे. सिद्धू मुसेवाला यांनी गोल्डी ब्रारचा बाऊ विकी मिदुखडा याच्या एन्काऊंटरसाठी मदत केली होती, असा आरोप गोल्डी ब्रारने केला आहे. तसेच याचाच बदला या हत्येच्या रुपाने घेतल्याचे त्याने पोस्टमध्ये म्हटले आहे. या हत्येच्या काही वेळानंतरच पंजाब पोलिसांनी ही हत्या गँगवॉरमधून घडल्याचे म्हटले होते.
पंजाब सरकारने दोन दिवसांपूर्वी राज्यातील ४२४ जणांची सुरक्षा काढून घेतली होती. त्यामध्ये सिद्धू मुसेवाला यांचाही समावेश होता.
सिद्धू मुसेवाला यांची राजकीय पार्श्वभूमी
गायक असण्याबरोबर सिद्धू मुसेवाला हे काँग्रेसचे नेते देखील होते. नुकत्याच झालेल्या विधानसभा निवडणुकीत त्यांनी काँग्रेसच्या तिकीटावर मनसामधून निवडणूक लढवली होती. पण ‘आप’च्या विजय सिंगला यांनी त्यांचा पराभव केला होता. पण हेच विजय सिंगला आरोग्यमंत्री झाल्यानंतर त्यांच्यावर भ्रष्टाचाराचा आरोप झाला आणि मुख्यमंत्री मान यांनी त्यांची मंत्रिमंडळातून हकालपट्टी केली, तसेच ते सध्या अटकेत आहेत.
