संजय राऊतांच्या घरी सापडलेल्या नोटांच्या बंडलवर एकनाथ शिंदे यांचे नाव?
शिवसेनेचे खासदार संजय राऊत यांना EDने अटक केल्यानंतर त्यांच्या घरातून जवळपास साडे अकरा लाख रुपयांची रक्कम जप्त करण्यात आल्याचे सांगितले जाते आहे. संजय राऊत यांच्याकडे एवढी रक्कम रोख स्वरुपात कुठून आली अशी विचारणा त्यांचे भाऊ सुनिल राऊत यांना पत्रकारांनी केली तेव्हा, सुनिल राऊत यांनी एक मोठा दावा केला आहे.
संजय राऊत यांच्या घरी रविवारी सकाळी EDचे अधिकारी दाखल झाले. या अधिकाऱ्यांनी दिवसभर राऊत यांच्या घराची झाडाझडती घेतली. यामध्ये काही कागदपत्रं आणि रोख रक्कम जप्त करण्यात आल्याचे सांगितले जाते आहे. दिवसभर केलेल्या चौकशीनंतर संजय राऊत यांना ईडीने रात्री उशिरा अटक केल्याचे अधिकृतपणे सांगितले. राऊत यांचे भाऊ सुनिल राऊत यांनी या अटकेबाबत माहिती दिली. तसेच त्यावेळी पत्रकारांशी बोलताना सुनिल राऊत यांना मोठा दावा केला. जप्त करण्यात आलेल्या रकमेतील १० लाख रुपयांच्या बंडलवर एकनाथ शिंदे यांचे नाव आहे आणि ती रक्कम संजय राऊत नुकतेच अयोध्येला गेले असतानाची आहे. त्या बंडलवर एकनाथ शिंदे यांचे नाव लिहिले आहे याचा अर्थ तो पैसा पक्षाचा आणि एकनाथ शिंदे यांनी दिलेला आहे, असा दावाही सुनिल राऊत यांनी केला आहे.
त्याचबरोबर जी कागदपत्रं जप्त करण्यात आली आहे, तीच कागदपत्र संजय राऊत यांनी याआधी इन्कम टॅक्स विभाग, त्यानंतर राज्यसभेच्या उमेदवारीसाठी अर्ज दाखल करताना सादर केलेली आहे, त्यामुळे कोणतीही गोपनीय कागदपत्र जप्त झाली नसल्याचे त्यांनी सांगितले आहे.
एकीकडे त्या १० लाख रुपयांबाबत आणि कागदपत्रांबाबत सुनिल राऊत यांना हा केला असला तरी ईडीतर्फे यावर अजून कोणतीही अधिकृत माहिती देण्यात आलेली नाही. आता कोर्टात संजय राऊत यांना सादर केल्यानंतर ईडीतर्फे काय माहिती दिली जाते ते पाहणे महत्त्वाचे ठरणार आहे.
