Top
Home > News Update > Ground Report: वर्ध्यात कोरोना बळींच्या आकड्यांची लपवाछपवी

Ground Report: वर्ध्यात कोरोना बळींच्या आकड्यांची लपवाछपवी

कोरोनामुळे मृत्यूमुखी पडलेल्या लोकांचा आकडा लपवला जात असल्याचा आरोप होतो आहे. वर्धा जिल्ह्यात असा प्रकार घडला असल्याचे दाखवणारा आमचे प्रतिनिधी प्रणय ढोले यांचा ग्राऊंड रिपोर्ट...

Ground Report: वर्ध्यात कोरोना बळींच्या आकड्यांची लपवाछपवी
X

अनेकांचे बळी गेले आहेत. या आकडेवारीतही लपवाछपवी होत असल्याचा आरोप होतो आहे. पण आता वर्धा जिल्ह्यात असा प्रकार घडल्याचे समोर आले आहे. काही दिवसांपूर्वीच वर्धा जिल्ह्यात एकाच दिवशी 41 शवांना अग्नी देण्यात आला. पण प्रशासनाच्या यादीत 16 जणांची नोंद करण्यात आल्याचे वृत्त मॅक्स महाराष्ट्रने दाखवले होते. मॅक्स महाराष्ट्रने २२ तारखेला या संदर्भातले वृत्त पहिल्यांदा दिले. प्रशासनाकडून मृतांच्या संख्येबाबतचा घोळ होत असल्याच्या या वृत्तानंतर आमचे प्रतिनिधी प्रणय ढोले यांनी आणखी खोलात जाऊन जेव्हा शोध घेतला तेव्हा धक्कादायक माहिती समोर आली.

कोरोनाच्या पहिल्या लाटेत वर्धा जिल्ह्याला खूप कमी प्रमाणात झळ बसली होती. पण दुसऱ्या लाटेत मात्र मोठमोठे आकडे येऊ लागले होते. गेल्या काही दिवसांपासून जिल्ह्यात आकडे वाढू लागले आहेत. हा आकडा एकदा तर तब्बल ९००च्यावर गेला आहे. जिल्ह्यात कोरोनामुळे मृत्यूमुखी पडणाऱ्यांची संख्या वाढते आहे. पण तिथल्या प्रशासनाच्या या आकड्यांबाबतच्या दाव्यावर एका व्हिडीओने प्रश्नचिन्ह निर्माण केले आहे. याचे उत्तर शोधण्याचा प्रयत्न केला तेव्हा धक्कादायक माहिती समोर आली.

१७ एप्रिल ते २५ एप्रिल या 9 दिवसांच्या काळातील आकडेवारीच्या आधारे आपण यामधील सत्य शोधण्याचा प्रयत्न करुया...

१७ एप्रिल रोजी वर्धा जिल्ह्यात ४९३ रुग्ण आढळले होते. त्यानंतर 18 एप्रिलला- ६१३, 19 एप्रिल- ५७८, 20 एप्रिल- ७३०, 21 एप्रिल - ५७३, 22 एप्रिल -७५५, 23 एप्रिल - ७५२ अशी कोरोनाबाधीत रुग्णांची संख्या होती. आता पर्यंतच्या नोंदीनुसार जिल्ह्यातील सर्वात मोठी आकडेवारी २४ एप्रिल रोजी ९३२ तर २५ एप्रिलला ६८३ अशी होती.

आता कोरोनामुळे मृत्यूमुखी पडलेल्या रुग्णांची आकडेवारी पाहूया...

१७ एप्रिल रोजी १३ जणांचा मृत्यू झाला. 18 एप्रिल- १३, 19 एप्रिल – ११, 20 एप्रिल १२, 21 एप्रिल २०, 22 एप्रिल - १६, 23 एप्रिल - १७ 24 एप्रिल - ३१ आणि २५ एप्रिल रोजी १२ जणांचा मृत्यू झाला. म्हणजे शासकीय आकडेवारीनुसार सात दिवसात एकूण १७८ लोकांचा मृत्यू झाला. पण प्रत्यक्षात स्मशानभूमीमधील नोंदणी रजिस्टरमध्ये आमच्या प्रतिनिधीने मोजणी केली तेव्हा ही संख्या २८५ एवढी होती.







वर्धा जिल्ह्यातील 8 तालुक्यात कोरोनामुळे मृत्यूमुखी पडलेल्या रुग्णांवर अंत्यसंस्कार करण्यासाठी तालुकानिहाय एक स्मशानभूमी निश्चित करण्यात आली आहे. वरील आकडेवारी वर्धा तालुक्यातील आहे. याचाच अर्थ कोरोना बळींची संख्या आणि प्रत्यक्षात कोरोनामुळे होणारे मृत्यू यामध्ये कुठेतरी तफावत दिसते आहे.

वर्धा तालुक्यात असलेल्या मुख्य वैकुंठधाम येथे मृतांची नोंदणी करणाऱ्या दिलीप कुथे यांना आम्ही यासंदर्भात विचारला असता डाटा एन्ट्री मीच करतो आणि ही आकडेवारी आपण स्वतः लिहली असल्याचे त्यांनी सांगितले.


यासंदर्भात आमच्या प्रतिनिधीने उपविभागीय दंडाधिकारी सुरेश बगळे यांना संपर्क केला, त्यांनी भेटण्याची वेळ दिली, पण दिवसभरात ते भेटले नाहीत. त्यामुळे त्यांची प्रतिक्रिया मिळताच बातमीमध्ये अपडेट करण्यात येईल.

"वर्धा जिल्ह्यातील कोरोनाने मृत्यू झालेल्या रुग्णांच्या संख्येत भोंगळ कारभार सुरू आहे आणि अशातच ही आकडेवारी समोर येणे म्हणजे चिंताजनक आहे. या सर्व प्रकाराची तात्काळ चौकशी झाली पाहिजे अन्यथा युवा परीवर्तन की आवाज संघटनेतर्फे मोठा आंदोलन छेडलं जाईल, असा इशारा संघटनेचे जिल्हा अध्यक्ष निहाल पांडे यांनी दिला आहे.

तर या संपूर्ण प्रकरणाची वरिष्ठ अधिकाऱ्यांनी चौकशी करावी अशी मागणी, प्रहार जनशक्ती पक्षाचे जिल्हा अध्यक्ष विकास दांडगे यांनी केली आहे.

Updated : 2021-04-27T22:36:08+05:30
Tags:    
Next Story
Share it
Top