कोरोनाचा नवा विषाणू N44OK, दक्षिणेतील राज्यात जास्त संसर्ग

ब्रिटन, आफ्रिका या देशांमध्ये कोरोनाच्या विषाणूचा नवीन प्रकार आढळून आल्यानंतर मोठी खळबळ उडाली. या विषाणूचा संसर्ग वेगाने होत असल्याचेही निदर्शनास आले होते. पण आता भारताची चिंता वाढवणारी बातमी आली आहे. हैद्रराबाद इथल्या Cellular and Molecular Biology (CSIR-CCMB) या संशोधन संस्थेने केलेल्या संशोधनानुसार कोरोनाच्या N44OK या नवा विषाणूचा प्रसार दक्षिणेतील राज्यांमध्ये मोठ्या प्रमाणात होत आहे. जगभरात कोरोनाच्या विषाणूंचे नवीन प्रकार आढळले असले तरी भारतात त्यांचा संसर्ग मोठ्या प्रमाणात झालेला नाही. CCMBचे संचालक डॉ. राकेश मिश्रा यांनी दिलेल्या माहितीनुसार N440K विषाणूचा प्रसार दक्षिणेतील राज्यांमध्ये मोठ्या प्रमाणात होत आहे. याचा संसर्ग नेमका कसा होतो यावर बारीक लक्ष ठेवण्याची गरज आहे. या विषाणूच्या नवीन प्रकारांवर खूप बारीक लक्ष ठेवले तर त्यातून होणाऱ्या दुष्परिणांची तीव्रता कमी करता येईल असेही डॉ. मिश्रा यांनी सांगितले आहे. याच संस्थेने केल्या संशोधनुसार भारतात कोरोनाच्या विषाणूंचे विविध प्रकार आढळले आहेत. पण यातील काही विषाणूंचा धोका कमी असल्याचेही सांगण्यात येत आहे.

दरम्यान राज्यात गेल्या काही दिवसात कोरोनाचे रुग्ण वाढले असले तरी यामध्ये नवीन विषाणूच्या संसर्गाचे प्रकार समोर आले नसल्याची माहिती आरोग्य विभागाने नुकतीच दिली आहे. अमरावती, यवतमाळ, सातारा आणि पुणे अशा राज्यांमधील काही जिल्ह्यांमध्ये मागील आठवड्यापासून कोविड रुग्णांच्या दैनंदिन संख्येमध्ये वाढ होताना दिसत आहे. या वाढीची कारणे शोधण्याचा सर्वतोपरी प्रयत्न करण्यात येत आहे. या भागातील करोना विषाणूच्या जनुकीय रचनेमध्ये काही बदल झालेला आहे का, या संदर्भातही पाहणी आरोग्य विभागाकडून करण्यात आली आहे. आतापर्यंत अमरावती,यवतमाळ, सातारा या भागातील प्रत्येकी चार नमुने पुणे येथील बी जे वैद्यकीय महाविद्यालयामध्ये तपासण्यात आले असून या नमुन्यांच्या तपासणी अहवालानुसार या जिल्ह्यांमधील विषाणूमध्ये ब्रिटन,दक्षिण आफ्रिका किंवा ब्राझील या देशांमध्ये आढळलेल्या नवीन विषाणू प्रकारासारखा कोणताही बदल दिसून आलेला नाही. पुण्यातील १२ नमुने देखील या वैद्यकीय महाविद्यालयात तपासण्यात आले असून त्यामध्येही जनुकीय क्रमामध्ये कोणतेही बदल दिसून आलेले नाहीत. अधिक तपासणी सुरू असून अकोला, अमरावती आणि यवतमाळ या जिल्ह्यातील आणखी काही नमुने राष्ट्रीय विषाणू विज्ञान संस्था आणि राष्ट्रीय पेशी विज्ञान संस्था, पुणे या ठिकाणी जनुकीय तपासणी करता पाठवण्यात आले आहेत. या संदर्भातील सविस्तर अहवाल पुढील आठवड्यापर्यंत मिळण्याची शक्यता आहे असे आरोग्य विभागाकडून स्पष्ट करण्यात आले आहे