रस्ता दुरुस्तीसाठी चांदवड येथील नागरीकांचा उपोषणाचा इशारा

चांदवड : चांदवड येथील चंद्रेश्वरी कॉलनी आठवडे बाजार तळ येथील रस्त्याची प्रचंड दुरवस्था झाली असून नगरपरिषद प्रशासन व नगरपरिषद मधील सत्ताधारी याकडे जाणीवपूर्वक दुर्लक्ष करीत असल्याचे म्हणत संतप्त नागरिकांनी आज मुख्य अधिकारी अभिजित कदम व माजी नगराध्यक्ष भूषण कासलीवाल यांची वाहने अडवून त्यांना जाब विचारला व उपोषणाला बसण्याचा इशारा दिला.

यावेळी आमच्या कॉलनीतील रस्ते व गटारी या गेल्या दीड वर्षापासून खोदून ठेवल्या त्या कधी करणार? रस्त्यात जाण्या-येण्यासाठी जागा नाही चालताना जीव मुठीत धरून चालावे लागते असा जाब नागरिकांनी विचारला.

यावर भूषण कासलीवाल यांनी सांगितले की, तुम्ही रस्त्यामध्ये केलेले अतिक्रमण पहिले काढा व ते आम्ही काढण्यास गेलो असता त्या ठिकाणी तुम्ही दमदाटी करतात, तर मग आम्ही कसे काम करायचे असे उत्तर भूषण कासलीवाल यांनी चंद्रेश्वर कॉलनी येथील नागरिकांना दिले.

त्यावर आमच्या कॉलनीतील रस्ते व गटारीचे काम लवकरात लवकर केले नाही तर आम्ही सर्व कॉलनीतील रहिवासी नगरपरिषद कार्यालयासमोर आमरण उपोषणाला बसणार आहोत असा इशारा नागरिकांनी दिला.