निर्बंध कडक, 2 एप्रिल ते 30 एप्रिल तेजस एक्स्प्रेस रद्द
राज्यात दिवसेंदिवस कोरोनाचा प्रादुर्भाव वाढत असल्याने सरकारने आता निर्बंध अधिक कडक केले आहेत. शेजारी असलेल्या मध्यप्रदेश आणि गुजरातमध्येही कोरोनाचा फैलाव झपाट्याने वाढत आहे. या पार्श्वभूमीवर रेल्वे महाराष्ट्र - गुजरात दरम्यान धावणारी तेजस एक्स्प्रेस ही गाडी 2 एप्रिल ते 30 एप्रिल दरम्यान रद्द करण्याचा निर्णय घेण्यात आला आहे.
मुंबई आणि गुजरातमध्ये कोरोना रुग्णांची संख्या वाढत आहे. त्यामुळे रेल्वे प्रशासनाने अहमदाबाद येथून मुंबई सेंट्रल दरम्यान धावणारी तेजस एक्स्प्रेस गाडी महिनाभरासाठी रद्द करण्याचा निर्णय घेतला आहे. ज्या प्रवाशांनी पुढील महिन्यासाठी तिकीट बूक केले आहे, त्याबद्दल लवकरच सविस्तर माहिती दिली जाणार असल्याचे रेल्वेतर्फे सांगण्यात आले आहे. गेल्या वर्षी रेल्वेगाड्या रद्द केल्या होत्या. त्यावेळी तिकीटांचे पैसे प्रवाशांना परत दिले होते. दोन्ही राज्यांमध्ये कोरोनाची परिस्थिती गंभीर होत असल्यामुळे रेल्वे प्रशासनाने हा निर्णय घेतला आहे. दरम्यान राज्यात लॉकडाऊन लावण्याबाबत अद्याप निर्णय झालेला नाही. मात्र चर्चा त्या दिशेनेच सुरू असल्याची स्पष्ट माहिती आरोग्यमंत्री राजेश टोपे यांनी दिली आहे. सध्या काही दिवस निर्बंध कडक केले जाणार आहेत. मात्र लॉकडाऊन लागणारच नाही असे नाही, परिस्थिती पाहून याबाबतचा निर्णय घेतला जाणार असल्याचे टोपे यांनी स्पष्ट केले आहे.
