वैद्यकीय उपकरणांच्या बाबतीतही केंद्राचा महाराष्ट्राशी दुजाभाव - पृथ्वीराज चव्हाण
लसीकरणावरुन सध्या राजकारण पेटले असताना आता माजी मुख्यमंत्री पृथ्वीराज चव्हाण यांनी केंद्र सरकारवर गंभीर आऱोप केला आहे.
एकीकडे कोरोना लसीकरणावरुन केंद्र सरकार आणि राज्य सरकारमध्ये मोठा वाद निर्माण झालेला आहे. केंद्र सरकार महाराष्ट्राशी दुजाभाव करत असल्याचा आऱोप आरोग्यमंत्री, मुख्यमंत्र्यांनी केला आहे. तर दुसरीकडे आता केंद्राने कोरोनाविरुद्धच्या लढाईत लागणाऱ्या महत्त्वाच्या वैद्यकीय उपकरणांच्या पुरवठ्यातही महाराष्ट्राशी दुजाभाव केला असल्याचा आरोप माजी मुख्यमंत्री पृथ्वीराज चव्हाण यांनी केला आहे. पृथ्वीराज चव्हाण यांनी लोकसभेत सरकारतर्फे फेब्रुवारी महिन्यात देण्यात आलेल्या माहितीचा संदर्भ देत हा आऱोप केला आहे.
महाराष्ट्राला फक्त लसी देण्यातच नाही तर कोरोना काळात महत्वाची वैद्यकीय उपकरणे देण्यातसुद्धा केंद्र सरकारने दुजाभाव केला आहे. लोकसभेतील आकडेवारीनुसार गुजरात आणि उत्तर प्रदेश राज्यात रुग्णसंख्येच्या व्यस्त पटीने N95 मास्क, पीपीई किट्स आणि व्हेंटीलेटर्स केंद्र सरकारने दिले आहेत. pic.twitter.com/MdYDR4Ly3W
— Prithviraj Chavan (@prithvrj) April 10, 2021
"महाराष्ट्राला फक्त लसी देण्यातच नाही तर कोरोना काळात महत्वाची वैद्यकीय उपकरणे देण्यातसुद्धा केंद्र सरकारने दुजाभाव केला आहे. लोकसभेतील आकडेवारीनुसार गुजरात आणि उत्तर प्रदेश राज्यात रुग्णसंख्येच्या व्यस्त पटीने N95 मास्क, पीपीई किट्स आणि व्हेंटीलेटर्स केंद्र सरकारने दिले आहेत." असे ट्विटही पृथ्वीराज चव्हाण यांनी केले आहे. हजार रुग्णांच्या मागे सर्वाधिक पीपीई किट्स, N 95 मास्क आणि व्हेंटिलेटर्स हे गुजरातला देण्यात आले आहेत. तर त्यानंतर उत्तर प्रदेशला देण्यात आले आहेत. या यादीत महाराष्ट्राला प्रति हजार रुग्णांमागे 1560 N95 मास्क, 760 पीपीई किट्स आणि 2 व्हेंटिलेटर्स मिळाल्याचे या पत्रात दिल्याचे चव्हाण यांनी म्हटले आहे.
