मुख्यमंत्र्यांच्या पत्नीबद्दल आक्षेपार्ह ट्विट, भाजप पदाधिकाऱ्याची बिनशर्त माफी
मुंबई : एकीकडे भाजप आणि शिवसेनेमधला संघर्ष राज्यात अतिशय टोकाला गेलेला असताना आता आणखी एक नवीन वाद निर्माण झाला आहे. मुख्यमंत्री उद्धव ठाकरे यांच्या पत्नी रश्मी ठाकरे यांच्याबद्दल भाजपच्या सोशल मीडिया विभागाच्या प्रमुखांवर कारवाई करण्यात आली आहे. भाजपचे सोशल मीडिया सेल प्रमुख जितेन गजारिया यांनी ट्विट करत 'मराठी राबडी देवी' असा आक्षेपार्ह उल्लेख ट्विटरवर केला होता. यानंतर सायबर पोलिसांनी जितेन गजारिया नोटीस बजावली आणि गुरुवारी त्यांचा जबाब नोंदवण्यात आला. त्यानंतर गजारिया यांनी बिनशर्त माफी मागितल्याचे वृत्त सामना दैनिकाने दिले आहे.
So Shiv Sainiks are asking Police to take action against me for this tweet. What's objectionable here?
— Jiten Gajaria (@jitengajaria) January 5, 2022
At worse Rabru Sevi should feel offended. https://t.co/RPOuh2e0EB
जितेंद्र गजारिया यांनी रश्मी ठाकरे आणि उपमुख्यमंत्री अजित पवार यांच्याबद्दलही आक्षेपार्ह ट्विट केले होते. त्यानंतर गजारिया यांच्या विरोधात सायबर पोलिसांत तक्रार करण्यात आली होती. पण गजारिया यांनी आपल्या ट्विटचे समर्थन केले आहे. राबडी देवी बिहारच्या मुख्यमंत्री होत्या आणि त्यांच्याशी तुलना आक्षेपार्ह कशी ठरु शकते, असा सवालही त्यांनी उपस्थित केला आहे. गजारिया यांनी रश्मी ठाकरे यांच्याबद्दल ४ जानेवारी रोजी ट्विट करुन त्यांना राबडीदेवी असे संबोधले होते. त्यामुळे वाद निर्माण झाला आहे.
दरम्यान गजारिया यांच्याविरोधात कुणी तक्रार दाखल केली, याची माहिती मिळाली नसल्याचे भाजपने सांगितले आहे, असे वृत्त द प्रिंटने दिले आहे. तसेच दुसरीकडे द प्रिंटच्या वृत्तानुसार सायबर सेलच्या प्रमुख रश्मी करंदीकर यांनी काही महिलांनी तक्रार केल्याचे सांगत कारवाईची प्रक्रिया सुरू असल्याचे सांगितले आहे.
