"१५ लाख रुपयांपर्यंतच्या भ्रष्टाचाराला मी भ्रष्टाचार मानत नाही", भाजप खासदाराचे वक्तव्य

रिवा : मध्य प्रदेशमधील रिवा मतदारसंघाचे भाजप खासदार जनार्दन मिश्रा यांचा एक व्हिडीओ सध्या सोशल मीडियावर जोरदार व्हायरल होत आहे. ज्यात भाजपा खासदार मिश्रा भ्रष्टाचारावर बोलत आहेत. '१५ लाख रुपयांपर्यंतचा भ्रष्टाचार भ्रष्टाचार नसल्याचं' बोलताना ते दिसत आहेत. हे बोलताना ते सरपंचाच्या निवडणुकीतच एकावेळी ७ लाखाचा खर्च येतो, पुढील निवडणुकीच्या तयारीचा ७ लाख खर्च आणि महागाई धरून १ लाख असे एकूण १५ लाख त्याला मिळवायचे असतात. त्यामुळे १५ लाखाचा भ्रष्टाचार ठीक आहे. मात्र , त्यापेक्षा जास्तचा भ्रष्टाचार केला तरच माझ्याकडे या असं मी लोकांना सांगतो, असं धक्कादायक विधान खासदार मिश्रा यांनी केलं.

पुढे बोलताना खासदार मिश्रा म्हणाले की, "ही परिस्थिती आहे. हे समाजाचं नग्न चित्र आहे. याच क्रमाने वरच्या स्तरावर ही शिडी चढत जाते." खासदार मिश्रा रिवा या आपल्या मतदारसंघातील एका कार्यक्रमाला आले असता ते बोलत होते. त्यांचा हा व्हिडीओवर सध्या सोशल मीडियावर व्हायरल होत असून त्यावर जोरदार प्रतिक्रिया उमटत आहेत. हेच भाजपाचं स्वच्छ आणि भ्रष्टाचार मुक्त शासन का ? असंही लोक विचारत आहेत.

जनार्दन मिश्रा यांनी वादग्रस्त वक्तव्य करण्याचं हे पहिलंच उदाहरण नाही. यापूर्वी त्यांनी मोदींच्या दाढीतून पीएम घरकूल योजनेतील घरं येतात असं विधान केलं होतं.