अटकपूर्व जामिनासाठी नितेश राणेंची धावधाव

कणकवलीमधील शिवसेनेचे पदाधिकारी संतोष परब यांच्यावरील हल्ल्याप्रकरणी भाजपचे आमदार नितेश राणे अडचणीत आले आहेत. नितेश राणे यांच्यावर खुनाचा प्रयत्न केल्याचा गुन्हा दाखल झाला असल्याने त्यांनी अटकपूर्व जामिनासाठी प्रयत्न सुरू केले आहेत. नितेश राणे यांनी सिंधुदुर्ग कोर्टात केलेला अटकपूर्व जामीनअर्ज फेटाळला गेला आहे. त्यानंतर आता नितेश राणे यांनी मुंबई हायकोर्टात अटकपूर्व जामिनासाठी अर्ज दाखल केला आहे. या अर्जावर मंगळवारी सुनावणी होण्याची शक्यता आहे.

सिंधुदुर्ग जिल्हा बँकेच्या निवडणुकीत पक्षांतर्गत वादातून संतोष परब यांच्यावर हल्ला करण्यात आल्याचा आरोप होतो आहे. यामध्ये संतोष परब हे जखमी झाले होते. त्यानंतर हल्ल्याप्रकरणी अटक केलेल्या एका आरोपीने नितेश राणे यांचे नाव घेतल्याचे सांगत पोलिसांनी नितेश राणे यांच्यावर गुन्हा दाखल केला. पण तेव्हापासून नितेश राणे नॉट रिचेबल आहेत. या प्रकरणात नारायण राणे यांनी नितेश राणे कुठे हे आपल्याला माहिती असले तरी सांगणार नाही, असे जाहीर वक्तव्य केले होते. त्यामुळे पोलिसांनी नारायण राणे यांना नोटीस बजावून नितेश राणे हे एक आरोपी असल्याने ते कुठे आहेत याची माहिती द्यावी अशी मागणी केली होती. यासर्व राजकीय संघर्षामुळे सिंधुदुर्ग जिल्हा बँकेची निवडणूक रंगतदार ठरली होती. या निवडणुकीत नारायण राणे यांच्या पॅनलचा विजय झाला आहे.

पण आता नितेश राणे यांच्यावर हल्ला प्रकरणात अटकेची टांगती तलवार कायम आहे. त्यामुळे हायकोर्ट नितेश राणेंना दिलासा देणार का याकडे संपूर्ण राज्याचे लक्ष लागले आहे.