आता गोदी मीडियातील Fake Newsवर कौन बनेगा करोडपतीमध्येही प्रश्न

फेक न्यूज आणि प्रक्षोभक वृत्तांकन करत असल्याचा आरोप काही न्यूज चॅनेल्सवर गेल्या काही दिवसात होतो आहे. पण एक फेक न्यूज एखाद्या न्यूज चॅनेलच्या आणि ती देणाऱ्या अँकर किंवा रिपोर्टरच्या उरावर कायमची कशी बसते, याचे उदाहरण समोर आले आहे. अमिताभ बच्चन यांच्या कौन बनेगा करोडपती या शोच्या नवीन सिझनचा प्रोमो आला आहे. या प्रोमोमध्ये एका गाजलेल्या फेक न्यूजचा उल्लेख करण्यात आला आहे.

पंतप्रधान नरेंद्र मोदी यांनी काही वर्षांपूर्वी अचानक जाहीर केलेल्या नोटबंदीमुळे सर्वत्र खळबळ उडाली होती. यानंतर काळा पैसा बाहेर काढण्यासाठी हा निर्णय घेण्यात आल्याचा दावा केला गेला होता. यावेळी काही न्यूज चॅनेल्सनी नवीन आलेल्या दोन हजारांच्या नोटेमध्ये GPS चीप असल्याचे वृत्त दिले होते. त्यामुळे हा पैसा कुठे जातो, कोण गोळा करतो आहे याची माहिती मिळेल असाही दावा या वृत्तांमध्ये करण्यात आला होता. पण नंतर हे सर्व खोटे असल्याचे सिद्ध झाले होते. २ हजारांच्या नोटेमध्ये अशी कोणतीही चीप नसल्याचे स्पष्ट झाले आहे.

याच फेक न्यूजचा संदर्भ देत कौन बनेगा करोडपतीच्या नवीन शो चा प्रोमो प्रसिद्ध करण्यात आला आहे. यामध्ये अमिताभ बच्चन हे स्पर्धक महिलेला जीपीएस टेक्नॉलॉजी कशात आहे असा प्रश्न विचारत आहेत आणि त्यात टाईपरायटर, टेलिव्हिजन, सॅटेलाईट आणि २ हजारांची नोट...यापैकी कशात जीपीएस आहे, असा सवाल विचारत आहेत. ती महिला २ हजारांच्या नोटेमध्ये जीपीएस असल्याचे सांगते आणि त्याला दाखला न्यूज चॅनेलच्या बातम्यांचा देते. यावर अमिताभ बच्चन हे "न्यूज चॅनेलची चूक असली तरी नुकसान तर स्पर्धकाचे झाले ना, असा सवाल विचारतात. आणि ज्ञान कुठेही मिळवा पण त्याची शहानिशा करुन घ्या, असा सल्लाही प्रेक्षकांना देतांना दिसतात.

We all know that one person jo humein aisi unverified sansani khabrein sunata hai! Tag them in the comments and tell them that "Gyaan jahaan se mile bator lo, lekin pehle tatol lo."

एकूणच न्यूज चॅनेलचे काम हे जबाबदारी असते, पण ती देतांना खोटी माहिती प्रसारित होणार नाही, सामाजिक तेढ निर्माण होणार नाही, याची खबरदारी घेणेही गरजेचे आहे, पण असे भान सुटलेल्या न्यूज चॅनेल्सच्या फेक न्यूजवर जर एखाद्या शो चा प्रोमो येत असेल तर त्या न्यूज चॅनेलसाठी ही शरमेची बाब आहे.