वादातील आनंदवन, डॉ. शीतल आमटेंच्या आरोपांवर आमटे कुटुंबाचे स्पष्टीकरण

आनंदवनात गेल्या काही दिवसांपासून आमटे कुटुंबामध्ये सुरू असलेल्या वादाच्या पार्श्‍वभूमीवर डॉक्टर विकास आमटे, डॉक्टर प्रकाश आमटे यांच्यासह आमटे कुटुंबियांनी एक निवेदन जाहीर करून आपली भूमिका स्पष्ट केलेली आहे. डॉक्टर विकास आमटे यांच्या कन्या आणि महारोगी सेवा समितीच्या सीईओ डॉक्टर शीतल आमटे कर्जगी यांनी काही दिवसांपूर्वी सोशल मीडियावर एक व्हिडीओ पोस्ट केला होता. या व्हिडिओमध्ये शीतल आमटे यांनी आनंदवन मधील कारभारावर आणि आमटे परिवारातील काही जणांवर अत्यंत गंभीर आरोप केले होते.

या आरोपांनंतर आमटे कुटुंबीयांतर्फे हे निवेदन प्रसिद्ध करण्यात आलेले आहे. या निवेदनात आमटे कुटुंबाने डॉक्टर शीतल आमटे कर्जगी यांनी केलेले सर्व आरोप फेटाळून लावले आहेत. एवढेच नाही तर डॉक्टर शीतल आमटे कर्जगी या सध्या नैराश्यात असून मानसिक ताणतणावात आहेत आणि याची कबुली त्यांनी स्वतः देखील दिलेली आहे असे सांगण्यात आलेले आहे. डॉ. विकास आमटे, डॉ. प्रकाश आमटे आणि डॉ. भारती व डॉ. मंदाकिनी आमटे यांनी या निवेदनावर सही केलेली आहे.