आगामी कसोटी मालिकेत अजिंक्य रहाणेचे उपकर्णधारपद धोक्यात
मुंबई : दक्षिण आफ्रिकेविरोधात होणाऱ्या आगामी कसोटी मालिकेसाठी आज भारतीय संघ जाहीर करण्यात येण्याची शक्यता असून अजिंक्य रहाणेचे उपकर्णधारपद आणि इशांत शर्माचे संघातील स्थान धोक्यात येण्याची शक्यता व्यक्त होत आहे.
भारत-आफ्रिका यांच्यात २६ डिसेंबरपासून सेंच्युरियन येथे पहिल्या कसोटीला सुरुवात होणार असून त्यानंतर ३ जानेवारीपासून जोहान्सबर्ग येथे दुसरी, तर ११ जानेवारीपासून केप टाऊन येथे तिसरी कसोटी होणार आहे. त्यानंतर भारत-आफ्रिका संघांत तीन एकदिवसीय सामने देखील होतील.
अजिंक्य रहाणेने गेल्या १२ कसोटींमध्ये अर्धशतक झळकावलेले नसून न्यूझीलंडविरोधात देखील रहाणे पहिल्या कसोटीत अपयशी ठरला. मात्र, कर्णधार विराट कोहलीने रहाणेची पाठराखण केल्याने त्याचे संघातील स्थान पक्के मानले जात आहे. मात्र त्याच्याऐवजी रोहित शर्माकडे उपकर्णधारपद सोपवण्यात येण्याची शक्यता आहे.
तसेच अनुभवी वेगवान गोलंदाज इशांत शर्मा पूर्वीप्रमाणे फॉर्ममध्ये दिसत नसून मोहम्मद सिराज, आवेश खान, प्रसिध कृष्णा यांसारखे युवा फळीतील गोलंदाज त्याची जागा घेण्यासाठी सज्ज आहेत.
तर श्रेयस अय्यरने न्यूझीलंडविरोधात कसोटी पदार्पणात दमदार कामगिरी केल्यामुळे त्याचे संघातील स्थान निश्चित मानले जात आहे. त्याच्यासह मधल्या फळीसाठी हनुमा विहारीला पसंती मिळण्याची दाट शक्यता आहे.
