गुजरातमध्ये गॅस गळती, ६ जणांचा मृत्यू, 20 गंभीर

सुरत – सुरतमध्ये गॅस गळती होऊन ६ जणांचा मृत्यू झाला आहे. तर २० पेक्षा जास्त लोकांची प्रकृती गंभीर आहे. शहरातील एका डाईंग मिलमध्ये गुरूवारी सकाळी ही गॅस गळतीची दुर्घटना झाली. उपचार सुरू असलेल्या रूग्णांची स्थिती अत्यंत नाजूक असल्याची माहिती हॉस्पिटलचे अधिकारी डॉ. ओमकार चौधरी यांनी दिली आहे.

गुरूवारी पहाटे सुरतमधील सचिन औद्योगिक वसाहतीमध्ये विश्वप्रेम डाइंग अँड प्रिंटिंग मिलजवळ उभ्या असलेल्या टँकरमधून ही गॅस गळती झाल्याचे सांगतण्यात येत आहे. तर एएनआयने दिलेल्या माहितीनुसार मिलच्या जवळच असलेल्या नाल्यात अज्ञात व्यक्तीने टँकरमधील विषारी द्रव्य सोडल्याने घटना घडल्याचे सांगण्यात येत आहे. या गळतीमुळे डाइंग मिलमध्ये उपस्तित असलेल्या कामगारांना श्वास घेण्यास त्रास होऊ लागला. या दुर्घटनेत श्वास गुदमरून ६ कामगारांचा मृत्यू झाला. त्यानंतर विषारी गॅसच्या गळतीमुळे इतरांनाही त्रास सुरू झाला. पहाटे ४.३० वाजता पोलीस आणि फायर ब्रिगेडला या घटनेची माहिती देण्यात आल्याचे समजते आहे, याचा अर्थ ही घटना पहाटे ३ ते ४ दरम्यान घडली. या घटनेचा तपास पोलिसांनी सुरू केला आहे. तसेच ही घटना नेमकी कशी घडली याच्या कारणांचाही शोध घेण्यात येत आहे.